6,0,6,6,6,4 - மிட்செல் ஸ்டார்க் ஓவரை பந்தாடிய லிவிங்ஸ்டோன் - வைரலாகும் காணொளி!
இங்கிலாந்து - ஆஸ்திரேலிய அணிகளுக்கு இடையேயான நான்காவது ஒருநாள் போட்டி நேற்று லண்டனில் உள்ள லார்ட்ஸ் கிரிக்கெட் மைதானத்தில் நடைபெற்று முடிந்தது. மழை காரணமாக 39 ஓவர்கள் கொண்ட போட்டியாக நடைபெற்ற இதில் டாஸ் வென்ற ஆஸ்திரேலிய அணி முதலில் பந்துவீசுவதாக அறிவித்தது.
அதன்படி களமிறங்கிய இங்கிலாந்து அணியில் தொடக்க வீரர் பென் டக்கெட் மற்றும் கேப்டன் ஹாரி புரூக் ஆகியோர் அரைசதம் கடந்து அசத்தினர். இறுதியில் லியாம் லிவிங்ஸ்டோனும் சிக்ஸர் மழை பொழிந்ததுடன் தனது அரைசதத்தையும் பதிவுசெய்து அசத்தினார். இதன் மூலம் இங்கிலாந்து அணியானது இன்னிங்ஸ் முடிவில் 5 விக்கெட்டுகளை இழந்த நிலையிலும் 312 ரன்களைக் குவித்து அசத்தியது.
அந்த அணியில் அதிகபட்சமாக கேப்டன் ஹாரி ப்ரூக் 87 ரன்களையும், பென் டக்கெட் 63 ரன்களையும், இறுதிவரை ஆட்டமிழக்காமல் இருந்த லியாம் லிவிங்ஸ்டோன் 62 ரன்களையும் குவித்தனர். ஆஸ்திரேலிய அணி தரப்பில் ஆடம் ஸாம்பா 2 விக்கெட்டுகளை கைப்பற்றினார். இதையடுத்து இலக்கை நோக்கி விளையாடிய ஆஸ்திரேலிய அணியில் தொடக்க வீரகள் டிராவிஸ் ஹெட் 34 ரன்களையும், மிட்செல் மார்ஷ் 28 ரன்களையும் சேர்த்து ஆட்டமிழந்தனர்.
அவர்களைத் தொடர்ந்து களமிறங்கிய ஆஸ்திரேலிய அணி வீரர்கள் இங்கிலாந்து அணியின் பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். இதனால் ஆஸ்திரேலிய அணி 24.4 ஓவர்களில் அனைத்து விக்கெட்டுகளையும் இழந்து 126 ரன்களுக்கு ஆல் அவுட்டானது. இங்கிலாந்து தரப்பில் அதிகபட்சமாக மேத்யூ பாட்ஸ் 4 விக்கெட்டுகளை வீழ்த்தினார். இதன்மூலம் இங்கிலாந்து அணி 186 ரன்கள் வித்தியாசத்தில் ஆஸ்திரேலியாவை வீழ்த்தி அபார வெற்றியைப் பெற்றது.
இந்நிலையில் இப்போட்டியில் இங்கிலாந்து அணி வீரர் லியாம் லிவிங்ஸ்டோன், இன்னிங்ஸின் கடைசி ஓவரை வீசிய மிட்செல் ஸ்டார்க் பந்துவீச்சில் அடுத்தடுத்து சிக்ஸர்களை விளாசி 28 ரன்களைக் குவித்து அசத்தினார். அதன்படி இங்கிலாந்து இன்னிங்ஸின் கடைசி ஓவரை மிட்செல் ஸ்டார்க் வீசிய நிலையில், அந்த ஓவரை எதொர்கொண்ட லியாம் லிவிங்ஸ்டோன் முதல் பந்திலேயே இமாலய சிக்ஸரை பறக்கவிட்டார்.
அதன்பின் இரண்டாவது பந்தை தவறவிட்ட அவர், அடுத்த மூன்று பந்துகளிலும் அடுத்தடுத்து 3 சிக்ஸர்களை விளாசி மிரட்டினார். அத்துடன் நிற்காத லிவிங்ஸ்டோன் அந்த ஓவரின் கடைசி பந்திலும் பவுண்டரி விளசியதன் மூலம், 4 சிக்ஸர்கள் ஒரு பவுண்டரி என அந்த ஓவரில் 28 ரன்களைக் குவித்து அணிக்கு தேவையான ஃபினிஷிங்கை கொடுத்ததுடன் தனது அரைசதத்தையும் பதிவுசெய்து அசத்தினார். இந்நிலையில் இக்காணொளியானது இணையத்தில் வைரலாகி வருகிறது.
Also Read: Funding To Save Test Cricket
இதன்மூலம் இங்கிலாந்து அணிக்காக சர்வதேச ஒருநாள் கிரிக்கெட்டில் ஒரே ஓவரில் அதிக ரன்களைக் குவித்த வீரர்கள் பட்டியலில் லியாம் லிவிங்ஸ்டோன் முதலிடத்தைப் பிடித்து அசத்தியுள்ளார். அதேசமயம் ஆஸ்திரேலிய அணிக்காக சர்வதேச ஒருநாள் கிரிக்கெட் போட்டிகளில் ஒரே ஓவரில் அதிக ரன்களை கொடுத்த பந்துவீச்சாளர் எனும் மோசமான சாதனையை மிட்செல் ஸ்டார்க் படைத்துள்ளதும் குறிப்பிடத்தக்கது.