PAW vs SLW, 2nd ODI: சித்ரா அமீன் சதத்தினால் பாகிஸ்தான் அசத்தல் வெற்றி!

பாகிஸ்தானில் சுற்றுப்பயணம் செய்துவரும் இலங்கை அணி ஒருநாள் மற்றும் டி20 தொடர்களில் விளையாடிவருகிறது. இதில் டி20 தொடரை 3-0 என்ற கணக்கில் பாகிஸ்தான் அணி வெற்றிபெற்று அசத்தியது.

இதையடுத்து இரு அணிகளுக்கும் இடையேயான ஒருநாள் தொடர் நடைபெற்றுவருகிறது. இதில் இரு அணிகளுக்கும் இடையேயான இரண்டாவது ஒருநாள் போட்டி இன்று கராச்சியில் நடைபெற்றது.

இப்போட்டியில் டாஸ் வென்ற பாகிஸ்தான் அணி முதலில் பேட்டிங்செய்ய தீர்மானித்து களமிறங்கியது. அதன்படி களமிறங்கிய பாகிஸ்தான் அணிக்கு சித்ரா அமீன் - முனீபா அலி இணை அதிரடியான தொடக்கத்தைக் கொடுத்தனர்.

தொடர்ந்து சிறப்பான ஆட்டத்தை வெளிப்படுத்திய இருவரும் அரைசதம் கடந்தனர். பின்னர் 56 ரன்களில் முனீபா அலி ஆட்டமிழக்க, மறுமுனையில் தொடந்து அபாரமாக விளையாடிவந்த சித்ரா அமீன் சதமடித்து அசத்தினார்.

இதன்மூலம் 50 ஓவர்கள் முடிவில் பாகிஸ்தான் மகளிர் அணி 2 விக்கெட் இழப்பிற்கு 253 ரன்களைச் சேர்த்தது. இதில் அதிகபட்சமாக சித்ரா அமீன் 123 ரன்களை எடுத்தார்.

அதன்பின் கடின இலக்கை துரத்தி களமிறங்கிய இலங்கை மகளிர் அணியில் ஹசினா பெரேரா 14, அத்தபத்து 16, ஹன்சிமா கருணரத்னே 27, வீரக்கொடி 20 என அடுத்தடுத்து விக்கெட்டுகளை இழந்தனர்.

பின்னர் ஜோடி சேர்ந்த் ஹர்ஷித்தா மாதவி - நிலக்ஷி டி சில்வா இணை நிதான ஆட்டத்தை வெளிப்படுத்தி ஓரளவு ரன்களைச் சேர்த்தனர். பின்னர் மாதவி 41 ரன்னிலும், டி சில்வா 32 ரன்களிலும் ஆட்டமிழந்தனர்.

அதன்பின் களமிறங்கிய வீராங்கனைகள் எதிரணி பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்தனர். 

இதனால் 50 ஓவர்கள் முடிவில் இலங்கை மகளிர் அணி 9 விக்கெட்டுகளை இழந்து 180 ரன்களை மட்டுமே சேர்த்தது. பாகிஸ்தான் தரப்பில் ஃபாதிமா சனா 4 விக்கெட்டுகளைக் கைப்பற்றினார்.

இதன்மூலம் பாகிஸ்தான் மகளிர் அணி 73 ரன்கள் வித்தியாசத்தில் இலங்கை மகளிர் அணியை வீழ்த்தி, ஒருநாள் தொடரையும் 2-0 என்ற கணக்கில் கைப்பற்றியுள்ளது.