ரஞ்சி கோப்பை கிரிக்கெட் தொடரின் 2024-25 சீசனின் முதல் கட்ட போட்டிகள் நிறைவடைந்துள்ள நிலையில், இரண்டாம் கட்டம் ஜனவரி 23ஆம் தேதி முதல் தொடங்கியது. இந்நிலையில் இத்தொடரின் அடுத்த சுற்று போட்டிகள் இன்று நடைபெறுகின்றன. அதன்படி இன்று நடைபெறும் போட்டி ஒன்றில் எலைட் குரூப் டி பிரிவில் இடம்பிடித்துள்ள ரயில்வேஸ் மற்றும் டெல்லி அணிகள் பலப்பரீட்சை நடத்தவுள்ளன. 

டெல்லி அருண் ஜெட்லி மைதானத்தில் நடைபெறும் இப்போட்டியில் டாஸ் வென்றுள்ள டெல்லி அணி முதலில் பந்துவீசுவதாக அறிவித்துள்ளது. இப்போட்டிக்கான டெல்லி அணியில் இந்திய அணியின் நட்சத்திர வீரர் விராட் கோலி பிளேயிங் லெவனில் இடம்பிடித்துள்ளதால், இப்போட்டியின் மீதான எதிர்பார்ப்புகளும் அதிகரித்துள்ளன. ஏனெனில் கிட்டத்திட்ட 12 ஆண்டுகளுக்கு பிறகு விராட் கோலி ரஞ்சி கோப்பை போட்டிகளில் விளையாடவுள்ளார். 

முன்னதாக நியூசிலாந்து, ஆஸ்திரேலிய அணிகளுக்கு எதிரான படுதோல்வியின் காரணமாக இந்திய அணி வீரர்கள் உள்ளூர் போட்டிகளில் விளையாடுவது கட்டாயமாக்கப்பட்டுள்ளது. இதனால் முந்தைய சுற்று போட்டிகளில் ரோஹித் சர்மா, யஷஸ்வி ஜெய்ஸ்வால், ரிஷப் பந்த், ஷுப்மன் கில் உள்ளிட்டோர் விளையாடிய நிலையில், இந்த சுற்றில் அவர்களுக்கு ஓய்வளிக்கப்பட்டுள்ளது குறிப்பிடத்தக்கது. 

ரயில்வேஸ் பிளேயிங் லெவன்: அஞ்சித் யாதவ், விவேக் சிங், சூரஜ் அஹுஜா(கேப்டன்), உபேந்திர யாதவ், முகமது சைஃப், பார்கவ் மெராய், கர்ண் சர்மா, ராகுல் சர்மா, ஹிமான்ஷு சங்வான், அயன் சவுதாரி, குணால் யாதவ்.

டெல்லி பிளேயிங் லெவன்: அர்பித் ராணா, சனத் சங்வான், விராட் கோலி, யாஷ் துல், ஆயுஷ் பதோனி (கேப்டன்), பிரணவ் ராஜுவன்ஷி, சுமித் மாத்தூர், சிவம் சர்மா, நவ்தீப் சைனி, மணி கிரேவால், சித்தாந்த் சர்மா.