டி20 உலகக்கோப்பை தொடரின் 8ஆவது சீசன் ஆஸ்திரேலியாவில் விறுவிறுப்பாக நடைபெற்று வருகிறது. இதில் அடிலெய்டில் இன்று இந்திய நேரப்படி பிற்பகல் 1.30 மணிக்கு ஆரம்பமாகும் சூப்பர் 12 சுற்று ஆட்டத்தில் நடப்பு சாம்பியன் ஆஸ்திரேலிய அணி ஆஃப்கானிஸ்தானை எதிர்கொள்கிறது.
நடப்பு டி20 உலகக்கோப்பை தொடரில் 2 வெற்றி, ஒரு தோல்வி, ஒரு முடிவில்லை என்று 5 புள்ளிகளுடன் உள்ள ஆஸ்திரேலியா அணி ரன்-ரேட்டில் வெகுவாக பின்தங்கி இருக்கிறது. இதனால் அந்த அணி அரைஇறுதி வாய்ப்பில் நீடிக்க இன்றைய ஆட்டத்தில் மிகப்பெரிய வித்தியாசத்தில் ஆஃப்கானிஸ்தானை வீழ்த்த வேண்டிய நெருக்கடியில் இருக்கிறது. அதனை செய்தாலும் நியூசிலாந்து, இங்கிலாந்து ஆகிய அணிகளுக்குரிய கடைசி லீக் ஆட்டத்தின் முடிவை பொறுத்தே ஆஸ்திரேலியாவின் தலைவிதி தீர்மானிக்கப்படும். குறிப்பாக நியூசிலாந்து அணி, அயர்லாந்திடம் வீழ்ந்தால் ஆஸ்திரேலியாவுக்கு சிக்கல் தீரும்.
அயர்லாந்துக்கு எதிரான முந்தைய ஆட்டத்தில் ஆஸ்திரேலிய அணியின் கேப்டன் ஆரோன் பிஞ்ச், டிம் டேவிட் ஆகியோர் தசைப்பிடிப்பு காயம் அடைந்தனர். இதனால் அவர்கள் இருவரும் இந்த ஆட்டத்தில் களம் காணுவார்களா? என்பது கேள்விக்குறியாகி இருக்கிறது. 'உடல் தகுதி சோதனையின் போது ஒரு சதவீதம் திருப்தியில்லை என்றால் கூட விளையாடமாட்டேன். இருப்பினும் நான் விளையாடுவதற்கு 70 சதவீதம் வாய்ப்பு இருப்பதாக கருதுகிறேன்' என்று ஆரோன் ஃபிஞ்ச் தெரிவித்துள்ளார். ஃபிஞ்ச் விளையாடாவிட்டால் மேத்யூ வேட் கேப்டன் பணியை கவனிப்பார்.
முகமது நபி தலைமையிலான ஆஃப்கானிஸ்தான் 2 தோல்வி, 2 முடிவில்லையுடன் 2 புள்ளி பெற்று கடைசி இடத்தில் இருக்கிறது. சூப்பர்12 சுற்றில் வெற்றி பெறாத ஒரே அணியான ஆஃப்கானிஸ்தான், ஆறுதல் வெற்றியோடு தாயகம் திரும்ப தீவிரமாக முயற்சிக்கும். மேலும் ஆஃப்கானிஸ்தான் அணியின் முக்கிய ஆயுதமாக விளங்கும் சுழற்பந்து வீச்சாளர்கள், ஆஸ்திரேலிய பேட்ஸ்மேன்களுக்கு கடும் குடைச்சல் கொடுப்பார்கள் என்று எதிர்பார்க்கப்படுகிறது.
போட்டி தகவல்கள்
- மோதும் அணிகள் - ஆஸ்திரேலியா vs ஆஃப்கானிஸ்தான்
- இடம் - அடிலெய்ட் ஓவல், அடிலெய்ட்
- நேரம் - மதியம் 1.30 மணி
உத்தேச லெவன்
ஆஸ்திரேலியா - டேவிட் வார்னர், ஆரோன் பின்ச் (கே), மிட்செல் மார்ஷ், கிளென் மேக்ஸ்வெல், மார்கஸ் ஸ்டோனிஸ், டிம் டேவிட், மேத்யூ வேட், ஆடம் ஸாம்பா, பாட் கம்மின்ஸ், மிட்செல் ஸ்டார்க், ஜோஷ் ஹேசில்வுட்
ஆஃப்கானிஸ்தான் - ரஹ்மானுல்லா குர்பாஸ், உஸ்மான் கனி, இப்ராஹிம் சத்ரான், குல்பாடின் நைப், நஜிபுல்லாஹ் சத்ரான், முகமது நபி (கே), அஸ்மத்துல்லா உமர்சாய், ரஷித் கான், முஜீப் உர் ரஹ்மான், ஃபரீத் அகமது மாலிக், ஃபசல்ஹாக் ஃபரூகி.
ஃபேண்டஸி லெவன் டிப்ஸ்
- விக்கெட் கீப்பர்கள் - ரஹ்மானுல்லா குர்பாஸ், மேத்யூ வேட்
- பேட்டர்ஸ் - டேவிட் வார்னர், இப்ராஹிம் சத்ரன், மிட்செல் மார்ஷ்
- ஆல்-ரவுண்டர்கள் - கிளென் மேக்ஸ்வெல், மார்கஸ் ஸ்டோய்னிஸ், முகமது நபி
- பந்துவீச்சாளர்கள் - ஜோஷ் ஹேசில்வுட், ரஷித் கான், மிட்செல் ஸ்டார்க்