பிபிஎல் 2021: ஸ்டிரைக்கர்ஸை வீழ்த்தி முதல் வெற்றிபெற்றது பிரிஸ்பேன் ஹீட்!

பிக் பேஷ் லீக் டி20 தொடரில் இன்று நடைபெற்ற 18ஆவது லீக் ஆட்டத்தில் பிரிஸ்பேன் ஹீட் - அடிலெய்ட் ஸ்டிரைக்கர்ஸ் அணிகள் மோதின. 

இப்போட்டியில் முதலில் பேட்டிங் செய்த பிரிஸ்பேன் அணியின் கிறிஸ் லின் 10, மேக்ஸ் பிரையண்ட் 32, டாம் கூப்பர் 16 என அடுத்தடுத்து விக்கெட்டுகளை இழந்தனர்.

பின்னர் களமிறங்கிய பென் டக்கெட் - ஹஸெலெட் இணை அதிரடியாக விளையாடி ஸ்கோரை உயர்த்தினர். இதில் டக்கெட் அரைசதம் அடித்தார். 

இதன்மூலம் 20 ஓவர்கள் முடிவில் பிரிஸ்பேன் அணி 7 விக்கெட்டுகளை இழந்து 208 ரன்களைச் சேர்த்தது. இதில் அதிகபட்சமாக பென் டக்கெட் 78 ரன்களைச் சேர்த்தார். ஸ்டிரைக்கர்ஸ் தரப்பில் ரஷீத் கான் 3 விக்கெட்டுகளைக் கைப்பற்றினார். 

இதையடுத்து கடின இலக்கை துரத்திய அடிலெய்ட் ஸ்டிரைக்கர்ஸ் அணியில் ஜேக் வெதர்லட், மேத்யூ ஷார்ட், மேட் ரென்ஷோ ஆகியோர் சொற்ப ரன்களில் ஆட்டமிழந்தனர். 

பின்னர் களமிறங்கிய ஜானதன் வெல்ஸ் அதிரடியாக விளையாடி 55 ரன்களுடன் வெளியேறினார். பின்னர் வந்த வீரர்களும் அடுத்தடுத்து விக்கெட்டுகளை இழந்து தடுமாறினர். 

இதனால் 20 ஓவர்களில் அடிலெய்ட் அணியால் 8 விக்கெட் இழப்பிற்கு 169 ரன்களை மட்டுமே எடுக்க முடிந்தது. பிரிஸ்பேன் அணி தரப்பில் மேத்யூ, ஸ்டிகெடி தலா 3 விக்கெட்டுகளைக் கைப்பற்றினர். 

இதன்மூலம் பிரிஸ்பேன் ஹீட் அணி 39 ரன்கள் வித்தியாசத்தில் அடிலெய்ட் ஸ்டிரைக்கர்ஸை வீழ்த்தி, நடப்பு சீசனில் முதல் வெற்றியைப் பதிவுசெய்தது.