பிபிஎல் 2022: ஸ்டார்ஸை பந்தாடியது ஸ்காச்சர்ஸ்!

பிக் பேஷ் லீக் டி20 தொடரில் கரோனா தொற்று காரணமாக ஒத்திவைக்கப்பட்டிருந்த 27ஆவது லீக் ஆட்டம் இன்று நடைபெற்றது. இப்போட்டியில் மெல்போர்ன் ஸ்டார்ஸ் - பெர்த் ஸ்காச்சர்ஸ் அணிகள் பலப்பரீட்சை நடட்தின.

இப்போட்டியில் டாஸ் வென்று முதலில் பேட்டிங் செய்த பெர்த் ஸ்காச்சர்ஸ் அணி, நிக் ஹாப்சன், லௌரி எவன்ஸ், ஆஷ்டர்ன் டர்னர் ஆகியோரின் அதிரடியான அட்டத்தினால் 20 ஓவர்கள் முடிவில் 3 விக்கெட்டுகளை மட்டும் இழந்து 196 ரன்களைச் சேர்த்தது. 

இதில் அதிகபட்சமாக லௌரி எவன்ஸ் 69 ரன்களையும், கேப்டன் ஆஷ்டன் டர்னர் 47 ரன்காளையும் சேர்த்தனர். மெல்போர்ன் அணியில் ஹாரிஸ் ராவுஃப் 2 விக்கெட்டுகளைக் கைப்பற்றினார். 

இதையடுத்து கடின இலக்கை துரத்திய ஸ்டார்ஸ் அணியின் முன்வரிசை வீரர்கள் வந்த வேகத்திலேயே விக்கெட்டை இழந்து பெவிலியனுக்கு நடையைக் கட்டினர். 

இருப்பினும் மறுமுனையில் போராடிய வெப்ஸ்டர் அரைசதம் கடந்து நம்பிக்கையளித்தார். பின் 63 ரன்களைச் சேர்த்திருந்த வெப்ஸ்டரும் ஆட்டமிழக்க, ஸ்டார்ஸ் அணியின் தோல்வி உறுதியானது. 

இதனால் 20 ஓவர்கள் முடிவில் ஸ்டார்ஸ் அணியால் 9 விக்கெட் இழப்பிற்கு 149 ரன்களை மட்டுமே எடுக்க முடிந்தது. ஸ்காச்சர்ஸ் அணி தரப்பில் மேத்யூ கெல்லி 4 விக்கெட்டுகளைக் கைப்பற்றினார். 

இதன்மூலம் பெர்த் ஸ்காச்சர்ஸ் அணி 47 ரன்கள் வித்தியாசத்தில் மெல்போர்ன் ஸ்டார்ஸை வீழ்த்தி அபார வெற்றியைப் பெற்றது.