சிபிஎல் 2023: நிக்கோலஸ் பூரன் அதிரடியில் டிரின்பாகோ நைட்ரைடர்ஸ் அபார வெற்றி!

Updated: Mon, Aug 28 2023 12:43 IST
Image Source: Google

கரீபியன் பிரிமீயர் லீக் டி20 தொடரின் 12ஆவது சீசன் விறுவிறுப்பாக நடைபெற்றுவருகிறது. இதில் இன்று நடைபெற்ற 12ஆவது லீக் ஆட்டத்தில் செயிண்ட் கிட்ஸ் & நேவிஸ் பேட்ரியாட்ஸ் - டிரின்பாகோ நைட்ரைடர்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற நைட்ரைடர்ஸ் அணி முதலில் பந்துவீசுவதாக அறிவித்தது. 

அதன்படி களமிறங்கிய பேட்ரியாட்ஸ் அணியின் தொடக்க வீரர் எவின் லூயிஸ் 10 ரன்களுக்கும், அடுத்து களமிறங்கிய ஜோஷுவா டா சில்வா 18 ரன்களுக்கும், கூலி 11 ரன்களுக்கும் என விக்கெட்டை இழக்க, மறுபக்கம் அரைசதம் அடிப்பார் என எதிர்பார்க்கப்பட்ட ஆண்ட்ரே ஃபிளெட்சர் 32 ரன்கள் சேர்த்த நிலையில் ஆட்டமிழந்து பெவிலியன் திரும்பினார். 

பின்னர் இணைந்த ரூதர்ஃபோர்ட் - கார்பின் போஷ் இணை அதிரடியாக விளையாடி அணியின் ஸ்கோரை மளமளவென உயர்த்தினர். இதில் சிறப்பான ஆட்டத்தை வெளிப்படுத்திய ரூதர்ஃபோர்ட் அரைசதம் கடந்து அசத்தினார். இதன்மூலம் 20 ஓவர்கள் முடிவில் பேட்ரியாட்ஸ் அணி 5 விக்கெட்டுகளை இழந்து 178 ரன்களைக் குவித்தது.

இதையடுத்து இலக்கை நோக்கி களமிறங்கிய நைட்ரைடர்ஸ் அணியின் தொடக்க விரர்கள் சாத்விக் வால்டன், மார்ட்டின் கப்தில் ஆகியோர் அடுத்தடுத்து சொற்ப ரன்களுக்கு விக்கெட்டை இழந்து ஏமாற்றமளித்தனர். பின்னர் களமிறங்கிய நிக்கோலஸ் பூரன் - லோர்கன் டக்கர் இணை அதிரடியாக விளையாடி அணியின் ஸ்கோரை மளமளவென உயர்த்தினர். 

இதில் அபார ஆட்டத்தை வெளிப்படுத்திய நிக்கோலஸ் பூரன் அரைசதம் கடந்த கையோடு 61 ரன்களுக்கு ஆட்டமிழக்க, மறுப்பக்கம் இருந்த லோர்கன் டக்கரும் 26 ரன்களில் ஆட்டமிழந்தார். அதன்பின் கள்மைறங்கிய கேப்டன் பொல்லார்ட் 37 ரன்களையும், ஆண்ட்ரே ரஸல் 23 ரன்களையும் சேர்த்து அணிக்கு வெற்றியைத் தேடிக்கொடுத்தனர். 

இதன்மூலம் டிரின்பாகோ நைட் ரைடர்ஸ் அணி 17.1 ஓவர்களில் இலக்கை எட்டியதுடன் 6 விக்கெட் வித்தியாசத்தில் செயிண்ட் கிட்ஸ் & நேவிஸ் பேட்ரியாட்ஸ் அணியை வீழ்த்தி அபார வெற்றியைப் பதிவுசெய்தது. இப்போட்டியின் வெற்றிக்கு காரணமாக இருந்த நிக்கோலஸ் பூரன் ஆட்டநாயகனாகத் தேர்வு செய்யப்பட்டார். 

TAGS

தொடர்புடைய கிரிக்கெட் செய்திகள் ::