நான் நல்ல கேப்டன் கிடையாது - கேன் வில்லியம்சன்!

உலக அளவில் கேன் வில்லியம்சன் தலைசிறந்த கேப்டனாக திகழ்ந்து வருகிறார். நேரத்திற்கு தகுந்தார்போல் முடிவெடுத்து, அணியை கட்டுக்கோப்பாக, அமைதி வழியில் வழிநடத்துவதில், மகேந்திரசிங் தோனிக்கு அடுத்து இவர்தான் சிறந்தவர் என பலர் கூறுவதுண்டு.

இவர் நியூசிலாந்து அணிக்கு கேப்டனாக பொறுப்பேற்ற பிறகு ஐசிசி தொடர்களில் பல முறை அணியை அரையிறுதி, இறுதிப் போட்டிக்கு அணியை அழைத்து சென்றுள்ளார். கடந்த சீசனில் டேவிட் வார்னர் தலைமையிலான சன் ரைசர்ஸ் ஹைதராபாத் அணி படுமோசமாக சொதப்பிய பிறகு கேன் வில்லியம்சனுக்கு அப்பதவி தேடி வந்தது. இருப்பினும், அணி தொடர்ந்து தோல்விகளைத்தான் சந்தித்து வந்தது.

இதனால், 15ஆவது சீசனில் அணியை சிறப்பாக வழிநடத்தி பிளே ஆஃப் சுற்றுக்குள் கூட்டிச்செல்ல வேண்டிய கட்டாயத்தில் கேன் வில்லியம்சன் இருக்கிறார். மீண்டும், பழைய மாதிரி புள்ளிப் பட்டியலின் கடைசி இடத்தை பிடித்தால், வில்லியம்சனின் கேப்டன் பதவி பறிபோக வாய்ப்புள்ளது. இதனால், துவக்கம் முதலே வெற்றிகளை பெற்றுக்கொடுத்தே ஆக வேண்டும் என்ற நிர்பந்தம் இருக்கிறது.

இந்நிலையில் தற்போது பத்திரிகை ஒன்றுக்குப் பேட்டிகொடுத்துள்ள வில்லியம்சன் கேப்டன் பதவி குறித்து சில தகவல்களை பகிர்ந்துள்ளார். 

அதில் பேசிய அவர் ‘‘விளையாட்டில், பர்ஃபெக்ட் (perfect) கேப்டன்களே கிடையாது. அப்படியே சிலர் இருந்தாலும், அந்த சிலர் பட்டியலில் நான் இடம்பெற மாட்டேன். கேப்டன் பதவி எப்போதுமே சவால் மிக்கது. நீங்கள் தனிப்பட்ட திட்டம், யோசனைகளை வைத்திருக்கலாம். ஆனால், அதனை நீங்கள் தனி நபராக செயல்படுத்த முடியாது. குழுவின் ஒத்துழைப்பு தேவை. திட்டத்தை மாற்ற வேண்டும் என குழுவில் உள்ள அனைவரும் கூறினால், நீங்கள் மாற்றித்தான் ஆக வேண்டும்’’ எனக் கூறினார்.

கடந்த ஆண்டில் சன் ரைசர்ஸ் அணியில் விளையாடிய முக்கிய வீரர்கள் டேவிட் வார்னர், ரஷித் கான், விருத்திமான் சஹா, ஜேசன் ராய் போன்ற முக்கிய வீரர்களை, மெகா ஏலத்திற்கு முன் நிர்வாகம் கழற்றிவிட்டது. இருப்பினும் நடராஜன், புவனேஷ்வர் குமார் போன்றவர்களை மீண்டும் வாங்கியுள்ளது. மேலும், அதிரடி புயல் நிகோலஸ் பூரனை அந்த அணி வாங்கியிருப்பதால், இந்தாண்டில் பூரன் தனிநபராக சில போட்டிகளை வென்று கொடுப்பார் என எதிர்பார்க்கப்படுகிறது.