எமர்ஜிங் ஆசிய கோப்பை 2023: இலங்கையை வீழ்த்தி இறுதிப்போட்டிக்கு முன்னேறியது பாகிஸ்தான்!

இளம் வீரர்களுக்கான எமர்ஜிங் ஆசிய கோப்பை கிரிக்கெட் தொடர் இலங்கையில் நடைபெற்றுவருகின்றன. இதில் இன்று நடைபெற்ற முதலாவது அரையிறுதிப் போட்டியில் பாகிஸ்தான் ஏ - இலங்கை ஏ அணிகள் பலப்பரீட்சை நடத்தின. இப்போட்டியில் டாஸ் வென்ற பாகிஸ்தான் அணி முதலில் பந்துவீசுவதாக தீர்மானித்தது. 

அதன்படி களமிறங்கிய பாகிஸ்தான் அணியில் சைம் அயூப் 22 ரன்களுக்கும், ஃபர்ஹான் 12 ரன்களுக்கும் ஆட்டமிழக்க, அடுத்து வந்த தஹிப் தஹிர் 26, கசிம் அக்ரம் 8 ரன்களுக்கும் என அடுத்தடுத்து விக்கெட்டுகளை இழந்தனர். பின்னர் இணைந்த ஒமைர் யூசுப் - முகமது ஹாரிஸ் இணை சிறப்பான ஆட்டத்தை வெளிப்படுத்தி ஸ்கோரை உயர்த்தினர். 

தொடர்ந்து சிறப்பான ஆட்டத்தை வெளிப்படுத்திய இருவரும் அரைசதம் கடந்தனர். பின் 88 ரன்களுக்கு ஒமைர் யூசுப்பும், 52 ரன்களுக்கு முகமது ஹாரிஸும் விக்கெட்டை இழந்தனர். இறுதியில் முபசிர் கான் 42 ரன்களுக்கு ஆட்டமிழந்தார். இதனால் 50 ஓவர்கள் முடிவில் பாகிஸ்தான் அணி அனைத்து விக்கெட்டுகளையும் இழந்து 322 ரன்களுக்கு ஆல் அவுட்டானது. 

இதையடுத்து இலக்கை நோக்கி களமிறங்கிய இலங்கை அணியில் லசித் ரன்கள் ஏதுமின்றியும், மினோத் பானுகா 1 ரன்னுக்கும், சூரியபந்தரா 10 ரன்களுக்கும் என ஆட்டமிழந்தனர். பின்னர் இணைந்த அவிஷ்கா ஃபெர்னாண்டோ - சஹான் ஆராச்சிகே இணை அதிரடியான ஆட்டத்தை வெளிப்படுத்திய இருவரும் அணியின் ஸ்கோரை உயர்த்தினர். 

இதில் சதமடிப்பார் என எதிர்பார்க்கப்பட்ட அவிஷ்கா ஃபெர்னாண்டோ 97 ரன்களுக்கும், சஹான் ஆராசிகே 97 ரன்களிலும் என ஆட்டமிழந்து சதமடிக்கும் வாய்ப்பை தவறவிட்டார். பின்னர் களமிறங்கிய வீரர்களும் சொற்ப ரன்களுக்கு ஆட்டமிழக்க, 45.4 ஓவர்களுக்கு இலங்கை அணி அனைத்து விக்கெட்டுகளையும் இழந்து 262 ரன்களுக்கு ஆல் அவுட்டானது. 

பாகிஸ்தான் அணி தரப்பில் அபாரமாக பந்துவீசிய அர்ஷத் இக்பால் 5 விக்கெட்டுகளைக் கைப்பற்றினர். இதன்மூலம் பாகிஸ்தான் ஏ அணி 60 ரன்கள் வித்தியாசத்தில் இலங்கை ஏ அணியை வீழ்த்தி எமர்ஜிங் ஆசிய கோப்பை கிரிக்கெட் தொடரின் இறுதிப்போட்டிக்கு முன்னேறியது.