வரும் டிசம்பர் 19ஆம் தேதி 2024 ஐபிஎல் தொடருக்கான வீரர்களின் ஏலம் நடைபெறவுள்ளது. இந்நிலையில் இந்த ஆண்டின் தொடக்கத்தில் ராஜஸ்தான் ராயல்ஸ் அணிக்காக ஐபிஎல்லில் அறிமுகமான இங்கிலாந்து வீரர் ஜோ ரூட், தக்கவைப்பு காலக்கெடுவுக்கு ஒரு நாள் முன்னதாக ஐபிஎல் 2024ல் இருந்து விலகியுள்ளார். ரூட்டின் முடிவை தாங்கள் மதிக்கிறோம் என்று ராயல்ஸ் தனது இணையதளத்தின் ஒரு அறிக்கையில் தெரிவித்துள்ளது.
இதுகுறித்து அந்த அணியின் அணியின் கிரிக்கெட் இயக்குனர் குமார் சங்கக்கார "எங்கள் தக்கவைப்பு உரையாடல்களின் போது, ஐபிஎல் 2024 இல் பங்கேற்பதில்லை என்ற தனது முடிவை ஜோ எங்களிடம் தெரிவித்தார். மேலும் குறுகிய காலத்தில் கூட, ஜோ ரூட், உரிமையாளருக்கும் அவரைச் சுற்றியுள்ள வீரர்களுக்கும் இவ்வளவு நேர்மறையான தாக்கத்தை ஏற்படுத்த முடிந்தது. குழுவைச் சுற்றியுள்ள அவரது ஆற்றல் மற்றும் ராயல்சுக்கு அவர் கொண்டு வந்த அனுபவத்தை இழக்க நேரிடும். அவருடைய முடிவை நாங்கள் முழுமையாக மதிக்கிறோம் மற்றும் அவர் செய்யும் எல்லாவற்றிலும் வெற்றி பெற வாழ்த்துகிறேன்" என்று அவர் தெரிவித்தார்.
முன்னதாக ஐபிஎல் 2023 ஏலத்தில், ரூட் தனது அடிப்படை விலையான இந்திய மதிப்பில் 1 கோடி ரூபாய்க்கு ராயல்சால் எடுக்கப்பட்டார். மேலும் அத்தொடரில் அவர் மூன்று போட்டிகளில் விளையாடினார். தங்கள் நாட்டின் டெஸ்ட் கேப்டன் பென் ஸ்டோக்ஸுக்குப் பிறகு ஐபிஎல் 2024இல் இருந்து ஜோ ரூட் இரண்டாவது இங்கிலாந்து வீரராக விலகியுள்ளார். டிசம்பர் 19 ஆம் தேதி ஏலத்திற்கு முன்னதாக உரிமையாளர்கள் தங்கள் வெளியீடுகள் மற்றும் தக்கவைப்புகளை அறிவிப்பதற்கான காலக்கெடு இன்றுடன் முடிவடைகிறது.
ஐக்கிய அரபு எமிரேட்சில் ஐபிஎல் ஏலம் நடக்கவுள்ள நிலையில், அதற்கு முன்னதாக அணி நிர்வாகங்களுக்கு வீரர்களை வர்த்தக ரீதியாக மாற்றிக்கொள்வது உட்பட சில சலுகைகளை பிசிசிஐ வழங்கியது. அந்த சலுகையின்படி, லக்னோ சூப்பர் ஜெயண்ட்ஸ் மற்றும் ராஜஸ்தான் ராயல்ஸ் அணிகள் இரண்டு வீரர்களை நேரடியாக இடமாற்றிக்கொண்டன. அதன்படி, தேவ்தத் படிக்கல் லக்னோ அணிக்கும் ஆவேஷ் கான் ராஜஸ்தான் அணிக்கும் மாற்றம் செய்யப்பட்டனர்.
2022ல் நடைபெற்ற ஐபிஎல் ஏலத்தில் லக்னோ சூப்பர் ஜெயண்ட்ஸ் அணி ஆவேஷ் கானை 10 கோடி ரூபாய்க்கும், ராஜஸ்தான் ராயல்ஸ் அணி தேவ்தத் படிக்கல்லை 7.75 கோடி ரூபாய்க்கும் விலைக்கு வாங்கின. தற்போது இவ்விரு வீரர்களையும் அதே விலைக்கு வர்த்தக ரீதியாக இரு அணிகளும் இடம் மாற்றம் செய்துள்ளன.