குல்தீப் யாதவ்விற்கு அறுவை சிகிச்சை!

இந்திய அணியின் சுழற்பந்துவீச்சாளர் குல்தீப் யாதவ். இவர் இந்திய அணிக்காக 7 டெஸ்டுகள், 65 ஒருநாள், 23 டி20 ஆட்டங்களில் குல்தீப் யாதவ் விளையாடியுள்ளார். சமீபத்தில் இலங்கைக்குச் சென்ற இந்திய அணியிலும் இடம்பெற்று ஒருநாள், டி20 தொடர்களில் விளையாடினார்.

ஐபிஎல் போட்டியில் கொல்கத்தா அணியில் இடம்பெற்றுள்ள குல்தீப் யாதவ் - கடந்த வருடம் 5 ஐபிஎல் ஆட்டங்களில் விளையாடி 1 விக்கெட் மட்டுமே எடுத்தார். இதனால் இந்த வருடம் எந்தவொரு ஐபிஎல் ஆட்டத்திலும் அவர் இடம்பெறவில்லை. 2019 ஐபிஎல் முதல் மிக மோசமாகப் பந்துவீசி வருவதால் இந்திய அணியிலும் தன்னுடைய இடத்தை அவர் இழந்துள்ளார்.

இந்நிலையில் ஐக்கிய அரபு அமீரகத்தில் பயிற்சியில் ஈடுபட்டிருந்தபோது குல்தீப் யாதவுக்கு முழங்காலில் காயம் ஏற்பட்டது. ஃபீல்டிங் செய்தபோது ஏற்பட்ட அந்தக் காயம் தீவிரமாக இருந்ததால் அதற்கு மேலும் ஐபிஎல் போட்டியில் பங்குபெற முடியாத சூழல் உருவானது. 

இதையடுத்து சிகிச்சைக்காக குல்தீப் யாதவ் உடனடியாக இந்தியாவுக்குத் திருப்பி அனுப்பப்பட்டார். மேலும் காயத்துக்காக மும்பையில் அறுவைச் சிகிச்சை செய்துகொண்டார். இதனால் அடுத்த நான்கு முதல் ஆறு மாதங்கள் வரை அவரால் எந்தவொரு கிரிக்கெட் ஆட்டங்களிலும் இடம்பெற முடியாது என அறியப்படுகிறது. 

Also Read: இந்திய அணியின் இங்கிலாந்து சுற்றுப்பயணம், 2021

இந்நிலையில் அறுவைச் சிகிச்சை மேற்கொண்டது பற்றி ட்விட்டரில் குல்தீப் யாதவ் வெளியிட்டுள்ள பதிவில், “அறுவைச் சிகிச்சை வெற்றிகரமாக நடைபெற்றது. காயத்திலிருந்து மீண்டு வருவதற்கான நடவடிக்கை தொடங்கியுள்ளது. அனைவருடைய ஆதரவுக்கும் நன்றி. விரைவில் குணமாகி எனக்கு மிகவும் பிடித்த ஆடுகளத்துக்குத் திரும்புவதில் கவனம் செலுத்தவுள்ளேன்” என்று பதிவிட்டுள்ளார்.