இங்கிலாந்துக்கு சுற்றுப் பயணம் மேற்கொண்டுள்ள நியூசிலாந்து அங்கு அந்த அணிக்கு எதிராக 3 போட்டிகள் கொண்ட டெஸ்ட் தொடரில் பங்கேற்று வருகிறது. அதில் புதிய கேப்டனாக பொறுப்பேற்ற பென் ஸ்டோக்ஸ் தலைமையிலான இங்கிலாந்தை அதன் சொந்த மண்ணில் வரலாற்றின் முதல் டெஸ்ட் சாம்பியன்ஷிப் கோப்பையை வென்று சரித்திரம் படைத்த கேன் வில்லியம்சன் தலைமையிலான நியூசிலாந்து சந்தித்து வருகிறது.
இந்த தொடரில் ஜூன் 2ஆம் தேதி லண்டன் லார்ட்ஸ் மைதானத்தில் துவங்கி நடைபெற்ற முதல் போட்டியில் சிறப்பாக செயல்பட்ட இங்கிலாந்து 5 விக்கெட் வித்தியாசத்தில் அபார வெற்றி பெற்று 1 – 0* (3) என ஆரம்பத்திலேயே முன்னிலை பெற்றது.
அதை தொடர்ந்து இத்தொடரின் வெற்றியாளரை தீர்மானிக்கும் 2வது போட்டி ஜூன் 10ஆம் தேதி டிரென்ட் பிரிட்ஜ் நகரில் தொடங்கி நடைபெற்றுவருகிறது. அதில் டாஸ் வென்ற இங்கிலாந்து முதலில் பந்து வீசுவதாக அறிவித்தது. இருப்பினும் அப்போட்டியில் நியூசிலாந்து கேப்டன் கேன் வில்லியம்சன் கரோனா பாதிக்கப்பட்டு தனிமைப் படுத்திக் கொண்டதால் டாம் லாதம் கேப்டனாக செயல்பட்டார். அதைத் தொடர்ந்து பேட்டிங்கை துவக்கிய நியூசிலாந்து முதல் போட்டியை போலல்லாமல் மிகச் சிறப்பாக பேட்டிங் செய்து 553 ரன்கள் குவித்தது.
அந்த அணிக்கு கேப்டன் டாம் லாதம் 26, வில் எங் 47, டேவோன் கான்வே 46, ஹென்றி நிக்கோலஸ் 30 என டாப் ஆர்டர் பேட்ஸ்மேன்கள் கணிசமான ரன்கள் எடுத்து நல்ல தொடக்கம் கொடுத்தனர். அதை மிடில் ஆர்டரில் பயன்படுத்திய டார்ல் மிட்சேல் சதமடித்து 23 பவுண்டரி 4 சிக்சர்களுடன் இரட்டை சதமடிக்கும் வாய்ப்பை நழுவவிட்டாலும் 190 ரன்கள் விளாசினார். அவருடன் சிறப்பாக பேட்டிங் செய்த டாம் ப்ளன்டால் சதமடித்து 106 ரன்கள் எடுத்தார். அதைத் தொடர்ந்து 2-வது இன்னிங்சை தொடங்கிய இங்கிலாந்து 2ஆவது நாள் முடிவில் 90/1 என்ற நிலைமையில் விளையாடி வருகிறது.
முன்னதாக எல்போ காயத்தால் கடந்த சில வருடங்களாகவே தொடர்ச்சியாக விளையாட முடியாமல் தடுமாறி வரும் நியூசிலாந்து கேப்டன் கேன் வில்லியம்சன் சமீப காலங்களில் நிறைய போட்டிகளில் பங்கேற்கவில்லை. கடந்த நவம்பரில் இந்தியாவுக்கு எதிராக ட்ராவில் முடிந்த கான்பூர் டெஸ்ட் போட்டியில் காயத்தால் வெளியேறிய அவர் ஐபிஎல் 2022 தொடருக்கு திரும்பிய போதிலும் பேட்டிங்கில் மோசமாக செயல்பாட்டு கேப்டனாகவும் சுமாராக செயல்பட்டார்.
இந்த தொடரில் லண்டனில் நடந்த முதல் போட்டியில் கூட பேட்டிங்கில் மோசமாக செயல்பட்ட அவர் அதன் காரணமாக கேப்டன்சிப் பொறுப்பில் முழு கவனம் செலுத்த முடியாமல் தவிக்கிறார். இருப்பினும் எப்போதெல்லாம் அவர் காயத்தால் விலகினாரோ அந்த அனைத்து போட்டிகளிலும் நியூசிலாந்தை வழிநடத்திய தொடக்க வீரர் டாம் லாதம் மிகச் சிறப்பாக கேப்டன்ஷிப் செய்து பெரும்பாலும் வெற்றிகளைப் பெற்றுக் கொடுத்தார். தற்போது நடைபெற்று வரும் 2ஆவது போட்டியில் கூட அவரது தலைமையில் அந்த அணி வெற்றிப் பாதையில் நடந்து வருகிறது.
அதனால் நியூசிலாந்தின் வெற்றியை கருத்தில் கொண்டும், அவரின் பணிச்சுமையை கருத்தில் கொண்டும் விரைவில் டாம் லாதம் நியூசிலாந்தின் முழுநேரக் டெஸ்ட் கேப்டனாக பொறுப்பேற்கும் சூழ்நிலையை உருவாக்கி விட்டதாக முன்னாள் நியூசிலாந்து வீரர் சைமன் டௌல் தெரிவிக்கிறார்.
இதுகுறித்து பேசிய அவர், “3ஆவது டெஸ்டில் கேன் வில்லியம்சன் கேப்டனாக விளையாடினால் அது தான் அவருடைய கடைசி போட்டியாக இருக்கும் என்று நினைக்கத் தொடங்கி விட்டேன். என்னை பொருத்தவரை டெஸ்ட் போட்டிகளில் டாம் லாதம் கேப்டனாக பொறுப்பேற்க வேண்டிய தருணம் இதுவாகும். கேன் வில்லியம்சன் நீண்ட காலமாக அந்த பணியை செய்து விட்டார். எனவே இனிமேல் அவரை நியூசிலாந்தின் சிறந்த பேட்ஸ்மேனாக மட்டும் பார்க்க விரும்புகிறேன்” என்று தெரிவித்துள்ளார்.
அவர் கூறுவதும் ஒரு வகையில் உண்மையாகவே உள்ளது. ஏனெனில் சமீப காலங்களில் கேன் வில்லியம்சன் போலவே உலகத்தரம் வாய்ந்த பேட்ஸ்மேன்களாக கருதப்படும் விராட் கோலி, ஜோ ரூட் போன்ற தரமானவர்கள் கூட கேப்டன்ஷிப் அழுத்தம் காரணமாக ரன்கள் குவிக்க தடுமாறினார்கள். இதில் ஜோ ரூட் மட்டும் விதிவிலக்காக ரன்கள் அடித்தாலும் அவரது அணி வெற்றி பெறவில்லை என்பதால் தாமாக பதவியை ராஜினாமா செய்து விட்டார் என்பது குறிப்பிடத்தக்கது.