ஐபிஎல் 2022: ஐந்தாம் இடத்திற்கு முன்னேறிய டெல்லி கேப்பிட்டல்ஸ்!

மும்பை பார்போர்ன் மைதானத்தில் நடைபெற்ற இந்த ஆட்டத்தில் டாஸ் வென்ற ஹைதராபாத் அணி பந்துவீச்சை தேர்வு செய்தது. தொடக்க வீரராக டெல்லி அணியில் மந்தீப் சிங்,டேவிட் வார்னர் ஆகியோர் களமிறங்கினர்.

மந்தீப் சிங் 5 பந்தை சந்தித்து டக் அவுட்டாகி வெளியேறினார். மிட்செல் மார்ஷ் 10 ரன்கள் எடுத்திருந்த போது சென் அபார்ட் பந்துவீச்சில் அவரிடமே பிடிப்பட்டு ஆட்டமிழந்தார். ஒரு முனையில் விக்கெட்டுகள் இழந்தாலும் டேவிட் வார்னர் தனது வழக்கமான அதிரடி ஷாட்களை ஆடி ரன் குவித்தார். இதனால் டெல்லி அணியின் ஸ்கோர் கிடுகிடுவென உயர்ந்தது. ஸ்ரேயாஸ் கோபால் வீசிய ஒரு ஓவரில் ரிஷப் பண்ட் ஹாட்ரிக் சிக்சர் மற்றும் பவுண்டரி அடித்து அசத்தினார். ஆனால் அடுத்த பந்திலேயே ஆட்டமிழந்தார். 16 பந்துகளில் அவர் 26 ரன்கள் அடித்திருந்தார்.

இதன் பின்னர் டேவிட் வார்னர், ரொமன் போவெல் ஆகியோர் சேர்ந்து ஹைதராபாத் அணி பந்துவீச்சை பதம் பார்த்தனர். இந்த ஜோடி 3வது விக்கெட்டுக்கு 100 ரன்களுக்கு மேல் பார்ட்னர்ஷிப் அமைத்தது. வார்னர் கடைசி வரை ஆட்டமிழக்காமல் 92 ரன்கள் அடிக்க, போவெல் 67 ரன்களை விளாசினார். உம்ரான் மாலிக் வீசிய அதிவேக கடைசி ஓவரில் போவெல் 19 ரன்களை விளாசி இருந்தார். இதனால் டெல்லி அணி 3 விக்கெட் இழப்பிற்கு 207 ரன்கள் எடுத்தது.

208 ரன்கள் எடுத்தால் வெற்றி என்ற இலக்குடன் களமிறங்கிய ஹைதராபாத் அணியின் தொடக்க வீரர்கள் அபிஷேக் சர்மா 7 ரன்களிலும், வில்லியம்சன் 4 ரன்களிலும் ஆட்டமிழக்க,ராகுல் திரிபாதி 22 ரன்கள் எடுத்து வெளியேறினார். இதனையடுத்து ஏய்டன் மார்க்ரம் , பூரான் ஜோடி அதிடிரயாக விளையாடி அணியை சரிவிலிருந்து மீட்டது.

முக்கிய கட்டத்தில் ஏய்டன் மார்க்ரம் 25 பந்துகளில் 42 ரன்கள் எடுத்து ஆட்டமிழந்தார். இதனால் பூரான் மட்டும் தனி நபராக நின்று சிக்சர், பவுண்டரி என விளாசினார், பூரான் 34 பந்துகளில் 62 ரன்கள் எடுக்க, மற்ற வீரர்கள் சோபிக்க தவறினர். இதனால் 20 ஓவர் முடிவில் ஹைதராபாத் அணி 186 ரன்கள் எடுத்து தோல்வியை தழுவியது.இதன் மூலம் புள்ளி பட்டியலில் டெல்லி 5ஆவது இடத்திற்கு முன்னேறியது. ஹைதராபாத் 6ஆவது இடத்துக்கு சரிந்தது.