சர்வதேச கிரிக்கெட்டிலிருந்து இளம் வயதில் ஓய்வை அறிவித்த நெதர்லாந்து வீரர்!

நெதர்லாந்து அணியின் நட்சத்திர வீரராக வலம் வந்தவர் பென் கூப்பர். இவர் கடந்த 2013ஆம் ஆண்டு நெதர்லாந்துக்காக அறிமுகமாகி தனது அதிரடியான ஆட்டத்தினால் அனைவரது கவனத்தையும் ஈர்த்தார். 

இதுவரை 13 ஒருநாள், 58 டி20 போட்டிகளில் நெதர்லாந்துக்காக விளையாடியுள்ள பென் கூப்பர் ஆயிரத்திற்கு அதிகமான ரன்களைச் சேர்த்துள்ளார். 

தற்போது 29 வயதாகும் பென் கூப்பர், இன்று சர்வதேச கிரிக்கெட்டிலிருந்து ஓய்வு பெறுவதாக அறிவித்துள்ளார். 

இதுகுறித்து அவர் தனது ட்விட்டர் பக்கத்தில், “இன்று, நான் சர்வதேச கிரிக்கெட்டில் இருந்து ஓய்வு பெறுவதை அறிவிக்கிறேன்.கடந்த எட்டு ஆண்டுகளாக நெதர்லாந்தை பிரதிநிதித்துவப்படுத்தி ஆரஞ்சு ஜெர்சியை அணிவது ஒரு முழுமையான மரியாதை மற்றும் பாக்கியமாக கருதுகிறேன்.

இந்த 8 ஆண்டுகளில் நான் பல அற்புதமான உச்சங்கள், சிறப்புத் தருணங்கள் மற்றும் கடினமான தாழ்வுகள் ஆகியவற்றை சந்தித்துள்ளேன். இதில் நான் எதையும் மாற்ற முடியாது, மிகவும் இனிமையான நினைவுகளுடன் என் நேரத்தை திரும்பிப் பார்ப்பேன்” என்று தெரிவித்துள்ளார்.