‘பட்லர் தூக்க கலக்கத்தில் இருந்தார்’ - ஆடம் கில்கிறிஸ்ட் சாடல்!

ஆஸ்திரேலியா - இங்கிலாந்து இடையேயான ஆஷஸ் தொடரின் முதல் டெஸ்ட்டில் ஆஸ்திரேலிய அணி வெற்றி பெற்ற நிலையில், 2ஆவது டெஸ்ட்  போட்டி அடிலெய்டில் நேற்று(டிசம்பர் 16) தொடங்கியது. இந்த போட்டியில் டாஸ் வென்ற ஆஸ்திரேலிய அணி முதலில் பேட்டிங் ஆடியது.

இதில் ஆஸ்திரேலிய அணி 473 ரன்களை குவித்து முதல் இன்னிங்ஸை டிக்ளேர் செய்தது. இதையடுத்து இங்கிலாந்து அணி முதல் இன்னிங்ஸை தொடங்கி ஆடிவருகிறது.

ஆஸ்திரேலிய அணியின் முதல் இன்னிங்ஸில் மார்கஸ் ஹாரிஸின் கடினமான கேட்ச்சை அபாரமாக பிடித்த இங்கிலாந்து விக்கெட் கீப்பர் ஜோஸ் பட்லர், அதன்பின்னர் மார்னஸ் லபுசாக்னே 2 கேட்ச்களை கோட்டைவிட்டார். இன்னிங்ஸின் 35ஆவது ஓவரில் லபுசாக்னே 21 ரன்னில் இருந்தபோது கொடுத்த சற்று சவாலான கேட்ச் வாய்ப்பை தவறவிட்ட ஜோஸ் பட்லர், 95 ரன்னில் களத்தில் இருந்தபோது கொடுத்த எளிதான கேட்ச்சையும் கோட்டைவிட்டார். 

இதில் 2ஆவதாக தவறவிட்ட கேட்ச் மிக மிக எளிதானது. இந்நிலையில், பட்லர் கேட்ச் தவறவிட்டது குறித்து பேசிய ஆல்டைம் பெஸ்ட் விக்கெட் கீப்பர்களில் ஒருவரான ஆஸ்திரேலியாவின் ஆடம் கில்கிறிஸ்ட், “மார்கஸ் ஹாரிஸின் கடினமான கேட்ச்சை பிடித்த பட்லர், அடுத்து  2 கேட்ச்களை தவறவிட்டார். அவரது விக்கெட் கீப்பிங் டெக்னிக்கை பற்றி ஆழமாக ஆராயவெல்லாம் நான் விரும்பவில்லை. 

ஆனால் இங்கிலாந்து விக்கெட் கீப்பர்களின் டெக்னிக் ஆஸ்திரேலியாவில் எடுபடாது. இங்கிலாந்து விக்கெட் கீப்பிங் சோம்பேறித்தனமான ஸ்டைல். ஆஸ்திரேலிய விக்கெட் கீப்பர்களுடன் ஒப்பிடுகையில், அவர்கள் விக்கெட் கீப்பிங் டெக்னிக் மெதுவாக இருக்கும்.

டெக்னிக்கெல்லாம் இரண்டாவது பிரச்னை தான். கவனக்குறைவுதான் பட்லர் கேட்ச்சை தவறவிட்டதற்கு காரணம். முதல் நாள் ஆட்டம் முடிவடையும் தருவாயில், பார்வையாளர்கள் தூக்க கலக்கத்தில் இருந்தனர். அதேபோல் பட்லரும் தூக்க கலக்கத்தில் சோர்வாக இருந்ததால் தான் கேட்ச்சை தவறவிட்டார்” என்று தெரிவித்தார்.