IND vs PAK, Asia Cup 2023: பாகிஸ்தான் அணியின் பிளேயிங் லெவன் அறிவிப்பு!

ஆசியக் கோப்பையை ஆசியக் கிரிக்கெட் கவுன்சில் நடத்துவதே, இந்திய - பாகிஸ்தான் அணிகள் மோதிக் கொள்ளும் போட்டியை மையப்படுத்திதான். இந்த இருநாடுகள் மோதிக் கொள்ளும் போட்டிக்கு கிடைக்கும் வருவாய்தான், ஆசியக் கிரிக்கெட் கவுன்சிலுக்கான முக்கிய வருவாயாக இருக்கிறது. எனவே இந்த இரு அணிகளும் குறைந்தபட்சம் இரண்டு முறை மோதும்படியே அட்டவணை தயாரிக்கப்படும்!

இந்த முறையும் இந்தியா பாகிஸ்தான் அணிகள் குறைந்தபட்சம் இரண்டுமுறை மோதம்படி ஆசியக் கிரிக்கெட் கவுன்சில் அட்டவணையை தயார் செய்திருந்தது. மேலும் ஒருநாள் கிரிக்கெட் வடிவத்தில் இந்தமுறை ஆசியக் கோப்பைத் தொடர் நடப்பதால், இந்தியா - பாகிஸ்தான் அணிகள் இறுதிப் போட்டியிலும் மோதும் வாய்ப்பு அதிகம். இதனால் ஆசியக் கிரிக்கெட் கவுன்சில் மிகவும் மகிழ்ச்சியில் இருந்தது.

இந்த நிலையில் இலங்கையில் ஒருபகுதியாக நடைபெறும் ஆசியக் கோப்பை தொடரில், யாரும் விரும்பாத அணியாக உள்ளே நுழைந்த மழை, எல்லோரையும் சேர்த்து மிகப்பெரிய ஏமாற்றத்திற்கு உள்ளாக்கி இருக்கிறது. இந்த நிலையில் ஆசியக் கோப்பை தொடரின் இரண்டாவது சுற்றில் நாளை இலங்கை கொழும்பு பிரேமதாசா மைதானத்தில் இந்தியா - பாகிஸ்தான் அணிகள் பலப்பரிட்சை நடத்த இருக்கின்றன.

இந்திய அணிக்கு இது இரண்டாவது சுற்றில் முதல் போட்டி. பாகிஸ்தான் அணிக்கு இது இரண்டாவது போட்டி. லாகூரில் நடைபெற்ற முதல் போட்டியில் ஏழு விக்கெட் வித்தியாசத்தில் வங்கதேச அணியை வென்றிருப்பது குறிப்பிடத்தக்கது. பாகிஸ்தான் அணி இந்தத் தொடரில் போட்டிக்கு ஒரு நாள் முன்னதாகவே விளையாடும் அணியை வெளியிட்டு வருகிறது. இது அவர்கள் எவ்வளவு முழுமையான அணியாக இருக்கிறார்கள் என்பதற்கான உதாரணம்.

அந்த வகையில் பாகிஸ்தான் அணி நாளை இந்தியாவுக்கு எதிரான போட்டிக்கான விளையாடும் அணியையும் அறிவித்திருக்கிறது. இதில் வங்கதேச அணிக்கு எதிராக விளையாடிய அதே அணி களமிறங்குகிறது. இந்தியாவுக்கு எதிராக முதல் போட்டியில் விளையாடிய முகமது நவாஸை நீக்கி இருக்கிறது.

பாகிஸ்தான் பிளேயிங் லெவன்: ஃபகார் ஸமான், இமாம்- உல்- ஹக், பாபர் ஆசாம் (கேப்டன்), முகமது ரிஸ்வான், ஆகா சல்மான், இஃப்திகார் அகமது, ஷதாப் கான், ஃபஹீம் அஷ்ரஃப், ஷாஹீன் அஃப்ரிடி, நசீம் ஷா, ஹாரிஸ் ரவுஃப்.