ஐபிஎல் 2022: அந்த வீரர் யுவராஜ் சிங்கை நினைவுப்படுத்தினார் - சஞ்சய் மஞ்ரேக்கர்!

ஐபிஎல் தொடரின் 22 ஆவது லீக் போட்டி நேற்று சென்னை சூப்பர் கிங்ஸ் மற்றும் பெங்களூரு ராயல் சேலஞ்சர்ஸ் அணிகளுக்கு இடையே நடைபெற்றது. இந்த போட்டியில் முதலில் விளையாடிய சென்னை அணி நிர்ணயிக்கப்பட்ட 20 ஓவர்களில் முடிவில் 216 ரன்களை குவிக்க பெங்களூரு அணி 193 ரன்கள் மட்டுமே குவித்ததால் 23 ரன்கள் வித்தியாசத்தில் சென்னை அணி இப்போட்டியில் பெங்களூரு அணியை வீழ்த்தியது. ஏற்கனவே முதல் 4 போட்டிகளில் தோல்வியை சந்தித்திருந்த சென்னை அணிக்கு இதுவே முதல் வெற்றி என்பது குறிப்பிடத்தக்கது.

இந்த போட்டியில் முதலில் விளையாடிய சென்னை அணி முதல் 10 ஓவர்களில் 60 ரன்களை மட்டுமே குவித்து 2 விக்கெட்டுகளை இழந்து இருந்தாலும் அடுத்த 10 ஓவர்களில் 156 ரன்கள் குவித்து அசாத்தியமான ஆட்டத்தை வெளிப்படுத்தியது. அதிலும் குறிப்பாக உத்தப்பா 50 பந்துகளில் 4 பவுண்டரி மற்றும் 9 சிக்ஸர் என 88 ரன்களை குவித்தார்.

அதேபோன்று ஷிவம் துபே 46 பந்துகளில் 5 பவுண்டரி மற்றும் 8 சிக்சர் என 95 ரன்களையும் குவித்து அசத்தினர். சென்னை அணி முதல் 10 ஓவர்களில் குறைந்தளவே ரன்களை குவித்து இருந்தால் அடுத்த 10 ஓவர்களில் எவ்வாறு விளையாடும் என்று எதிர்பார்க்கப்பட்ட வேளையில் ஷிவம் துபேவின் அதிரடி இந்த போட்டியில் அனைவரையும் அசர வைத்தது என்றே கூறலாம்.

இந்நிலையில் இந்த போட்டி முடிந்து ஷிவம் துபேவின் ஆட்டம் குறித்து பாராட்டியுள்ள இந்திய அணியின் முன்னாள் வீரரான சஞ்சய் மஞ்ச்ரேக்கர் அவரை யுவராஜ் சிங்குடன் ஒப்பிட்டு பேசியுள்ளார். 

இதுகுறித்து பேசிய அவர், “ஹசில்வுட் வீசிய பந்தை துபே பின்னால் சென்று சிக்ஸ் அடித்த விதம் மிகவும் சிறப்பாக இருந்தது. ஏற்கனவே பந்தை மிக நீண்ட தூரம் அடிக்கும் திறமை அவரிடம் உள்ளது. முன்பு யுவராஜ் சிங் இந்திய அணிக்காக அதை செய்து வந்த நிலையில் தற்போது ஷிவம் துபே மிகச்சிறப்பாக விளையாடுகிறார். அவரிடம் நல்ல தன்னம்பிக்கை இருக்கிறது.

நிச்சயம் இதுபோன்றே பல ஷாட்டுகளை அவர் மிகப்பெரிய சிக்ஸர்களாக விளாசுகிறார். ஷிவம் துபே அடித்த இரண்டு ஷாட்டுகள் போதும் அவர் வெறும் ஹிட்டர் மட்டும் கிடையாது அவர் ஒரு பவர்ஹிட்டர் என்பதற்கு” என தெரிவித்துள்ளார்.