ஷேன் வார்னேவின் மரணம் இயற்கையானதே - உடற்கூறாய்வு அறிக்கை!

ஆஸ்திரேலிய சுழல் ஜாம்பவான் ஷேன் வார்னே தாய்லாந்துக்கு சென்ற நிலையில், அங்கு அவரது சொந்த விடுதியில் திடீரென ஏற்பட்ட மாரடைப்பு காரணமாக உயிரிழந்தார். 52 வயதான ஷேன் வார்னே மரணம், கிரிக்கெட் உலகையே சோகத்திலும் அதிர்ச்சியிலும் ஆழ்த்தியது.

ஷேன் வார்னே திடீரென உயிரிழந்ததால் அவரது இறப்பு குறித்த சந்தேகம் எழுந்தது. அவரது அறையை பரிசோதித்த காவல்துறையினர், அவரது அறையில் சில இடங்கள் மற்றும் துண்டு, தலையணை ஆகியவற்றில் இரத்தக்கறை இருந்ததாக தெரிவித்திருந்தனர். 

அவருக்கு ஆஸ்துமா மற்றும் இரத்தப்போக்கு ஆகிய பிரச்னைகள் இருந்திருக்கலாம் என்றும் தெரிவிக்கப்பட்டிருந்தது. அவரது உடலில் காயங்கள் எதுவும் இல்லாததால் அவரது இறப்பு இயற்கையானதுதான் என காவல்துறையினர் ஏற்கனவே தெரிவித்திருந்தனர்.

ஷேன் வார்னே அவரது அறையில் உணர்வில்லாமல் கிடந்ததை கண்டு அவரது நண்பர்கள் தான் முதலுதவி செய்துள்ளனர். ஆனால் அவர்களது 20 நிமிட முதலுதவி சிகிச்சை பலனளிக்கவில்லை. மருத்துவமனைக்கு அழைத்துச்செல்லப்பட்ட ஷேன் வார்னே உயிரிழந்தார் என்று தெரிவித்திருந்தனர்.

இந்நிலையில், பிரேத பரிசோதனை அறிக்கை வெளிவந்த நிலையில், அதை ஷேன் வார்னே குடும்பத்தினரிடம் ஒப்படைத்த தாய்லாந்து காவல்துறை உயரதிகாரிகள், பிரேத பரிசோதனை அறிக்கையும் ஷேன் வார்னே இயற்கையாகவே உயிரிழந்தார் என்பதை உறுதிப்படுத்தியதாகவும், அதை அவரது குடும்பத்தினரும் ஏற்றுக்கொண்டு பிரேத பரிசோதனை அறிக்கையை வாங்கி சென்றதாகவும் தெரிவித்துள்ளனர்.