IND vs SL, 3rd ODI: இலங்கையை ஒயிட்வாஷ் செய்யுமா இந்தியா?

இலங்கையில் சுற்றுப்பயணம் மேற்கொண்டுள்ள ஷிகர் தவான் தலைமையிலான இந்திய கிரிக்கெட் அணி 3 போட்டிகள் கொண்ட ஒரு நாள் தொடரில் பங்கேற்றுள்ளது. இதில் முதல் ஆட்டத்தில் 7 விக்கெட் வித்தியாசத்திலும், 2ஆவது ஆட்டத்தில் 3 விக்கெட் வித்தியாசத்திலும் இந்திய அணி வெற்றி பெற்று தொடரையும் கைப்பற்றி விட்டது.

இந்த நிலையில் இந்தியா-இலங்கை அணிகள்ளுக்கு இடையேயாப 3ஆவது மற்றும் கடைசி ஒரு நாள் போட்டி கொழும்பு பிரேமதாசா மைதானத்தில் இன்று (ஜூலை 23) நடக்கிறது.

இத்தொடரில் ஷிகர் தவான் தலைமையிலான ஒவ்வொரு வீரர்களும் துடிப்புடன் செயல்படுகிறார்கள். தொடக்க ஆட்டத்தில் கேப்டன் ஷிகர் தவான், இஷான் கிஷன், பிரித்வி ஷா ஆகியோரின் பேட்டிங் அருமையாக இருந்தது. 2ஆவது ஆட்டத்தில் இந்திய அணியை தோல்வியின் விளிம்பில் இருந்து காப்பாற்றிய தீபக் சாஹர் 69 ரன்கள் விளாசி ஹீரோவாக ஜொலித்தார். சூர்யகுமார் யாதவின் அரைசதமும் உதவிகரமாக இருந்தது. பந்து வீச்சை பொறுத்தமட்டில் சுழற்பந்து வீச்சாளர் யுஸ்வேந்திர சாஹல் விக்கெட் வீழ்த்தியதுடன், சிக்கனமாகவும் பவுலிங் செய்து கவனத்தை ஈர்த்தார்.

தற்போது தொடரை வசப்படுத்தி விட்டதால் அணியில் இளம் வீரர்களுக்கு வாய்ப்பு அளிக்கப்படும் என்று தெரிகிறது. அந்த வகையில் தேவ்தத் படிக்கல், ருதுராஜ் கெய்க்வாட் மற்றும் சஞ்சு சாம்சன், நவ்தீப் சைனி உள்ளிட்டோரில் ஒரு சிலருக்கு இடம் கிடைக்கலாம். மற்றபடி தொடரை முழுமையாக வெல்லும் வேட்கையுடன் இந்தியா தயாராகி வருகிறது.

தசுன் ஷனகா தலைமையிலான இலங்கை அணியில் போதிய அனுபவ வீரர்கள் இல்லாவிட்டாலும் 2ஆவது போட்டியில் கடும் சவால் கொடுத்ததை பார்க்க முடிந்தது. இறுதி கட்டத்தில் அசலங்கா, சமிகா கருணாரத்னே இருவரும் அதிரடி காட்டி வியக்க வைத்தனர். 

ஏற்கெனவே தொடரை இழந்துள்ள இலங்கை அணி, இன்றைய போட்டியிலாவது வெற்றி பெற்று ஆறுதலைத் தேடும் என்றும் எதிர்பார்க்கப்படுகிறது. 

உத்தேச அணி

இலங்கை - அவிஷ்கா ஃபெர்னாண்டோ, மினோத் பானுகா, பானுகா ராஜபக்ஷ, தனஞ்சய டி சில்வா, சரித் அசலங்கா, தசுன் ஷானகா (கே), வாணிந்து ஹசரங்கா, சாமிகா கருணாரத்ன, துஷ்மந்தா சாமீரா, லக்ஷன் சண்டகன், கசுன் ராஜிதா.

இந்தியா - ஷிகர் தவான் (கே), பிருத்வி ஷா/ தேவ்தத் படிக்கல், இஷான் கிஷன், மனீஷ் பாண்டே/ சஞ்சு சாம்சன், சூர்யகுமார் யாதவ், ஹார்திக் பாண்டியா, குர்னால் பாண்டியா, தீபக் சாஹர், புவனேஷ்வர் குமார், யுஸ்வேந்திர சாஹல், குல்தீப் யாதவ்