PAKW vs SLW, 2nd T20I: இலங்கையை வீழ்த்தி தொடரை வென்றது பாகிஸ்தான்!

பாகிஸ்தானில் சுற்றுப்பயணம் செய்துவரும் இலங்கை மகளிர் அணி தற்போது 3 போட்டிகளைக் கொண்ட டி20 தொடரில் விளையாடி வருகிறது. இதில் இரு அணிகளுக்கும் இடையே நடைபெற்ற முதல் டி20 போட்டியில் பாகிஸ்தான் அணி வெற்றிபெற்று தொடரில் முன்னிலைப் பெற்றது.

இந்நிலையில் இரு அணிகளுக்கும் இடையேயான இரண்டாவது டி20 போட்டி கராச்சியில் இன்று நடைபெற்றது. இப்போட்டியில் டாஸ் வென்ற இலங்கை அணி முதலில் பந்துவீச தீர்மானித்தது. 

அதன்படி களமிறங்கிய இலங்கை அணியின் தொடக்க வீராங்கனையும் கேப்டனுமான அத்தபத்து 5 ரன்னிலும், ரணசிங்க 8 ரன்னிலும் ஆட்டமிழந்து ஏமாற்றமளித்தனர். 

பின்னர் ஜோடி சேர்ந்த ஹாசினி பெரேரா - டி சில்வா இணை சற்றுநேரம் பார்ட்னர்ஷிப் அமைத்து ஸ்கோரை உயர்த்தினார். பின்னர் பெரேரா 35 ரன்னிலும், டி சில்வா 21 ரன்களுக்கும் ஆட்டமிழந்தனர். 

அதைத்தொடர்ந்து களமிறங்கிய வீராங்கனைகள் ரன் குவிக்க தடுமாற, 20 ஓவர்கள் முடிவில் இலங்கை மகளிர் அணி 6 விக்கெட்டுகளை இழந்து 102 ரன்களை மட்டுமே சேர்த்தது. 

இதையடுத்து எளிய இலக்கை துரத்திய பாகிஸ்தான் மகளிர் அணியில் குல் ஃபெரோஸா, முனீப் அலி, இரம் ஜாவித் ஆகியோர் சொற்ப ரன்களுக்கு விக்கெட்டை இழந்தனர். 

அதன்பின் ஜோடி சேர்ந்த கேப்டன் பிஸ்மா மரூஃப் - ஆயிஷா நசீம் இணை அதிரடியாக விளையாடி அணியை வெற்றிக்கு அழைத்துச் சென்றனர். இதன்மூலம் 17.1 ஓவர்களில் பாகிஸ்தான் மகளிர் அணி இலக்கை எட்டி, 7 விக்கெட் வித்தியாசத்தில் இலங்கை மகளிர் அணியை வீழ்த்தியது. 

இதன்மூலம் மூன்று போட்டிகள் கொண்ட டி20 தொடரை பாகிஸ்தான் மகளிர் அணி 2-0 என்ற கணக்கில் கைப்பற்றி அசத்தியது.