டி20 உலக கோப்பை கிரிக்கெட் தொடர் நாளை முதல் நவம்பர் 13ஆம் தேதி வரை ஆஸ்திரேலியாவில் நடக்கிறது. அக்டோபர் 16 முதல் 21 வரை தகுதிச்சுற்று போட்டிகளும், அதன்பின்னர் சூப்பர் 12 சுற்று போட்டிகளும் நடக்கின்றன. சூப்பர் 12 சுற்று போட்டிகள் இரு பிரிவுகளாக பிரித்து நடத்தப்படுகின்றன.
க்ரூப் 1-ல் ஆஸ்திரேலியா, இங்கிலாந்து, நியூசிலாந்து, ஆஃப்கானிஸ்தான் அணிகளும், க்ரூப் 2-ல் இந்தியா, பாகிஸ்தான், தென்னாப்பிரிக்கா, வங்கதேசம் அணிகளும் இடம்பெற்றுள்ளன. இந்த 8 அணிகளும் நேரடியாக சூப்பர் 12 சுற்றில் ஆடும் அணிகள்.
சூப்பர் 12 சுற்றுக்கான எஞ்சிய 4 அணிகள் தகுதிச்சுற்று போட்டிகளில் ஆடி அதன்மூலம் தேர்வாகும். தகுதிச்சுற்றில் ஆடும் இலங்கை, வெஸ்ட் இண்டீஸ், நமீபியா, ஐக்கிய அரபு அமீரகம், நெதர்லாந்து, ஸ்காட்லாந்து, ஜிம்பாப்வே, அயர்லாந்து ஆகிய 8 அணிகளில் 4 அணிகள் சூப்பர் 12 சுற்றுக்கு முன்னேறும்.
குரூப் ஏ பிரிவில் இடம்பெற்றுள்ள இலங்கை மற்றும் நமீபியா அணிகள் நாளை ஜீலாங்கில் மோதுகின்றன. இலங்கை அணி டி20 உலக கோப்பை சூப்பர் 12 சுற்றுக்கு நேரடியாக தகுதிபெறவில்லை என்றாலும், அண்மையில் ஆசிய கோப்பையை வென்று மிகுந்த நம்பிக்கையுடனும் உற்சாகத்துடனும் உத்வேகத்துடனும் டி20 உலக கோப்பைக்கு வந்துள்ளது.
தசுன் ஷனாகா தலைமையில் இலங்கை அணி இளம் வீரர்களை கொண்ட மிரட்டல் படையாக உள்ளது. தகுதிச்சுற்றில் நமீபியா, அமீரகம், நெதர்லாந்து அணிகளை எதிர்கொள்வதால் அந்த அணிக்கு எதிராக எளிதாக வெற்றி பெற்று சூப்பர் 12 சுற்றுக்கு இலங்கை முன்னேறிவிடும் என்பதில் சந்தேகமில்லை.
இலங்கை அணியைப் பொறுத்தவரையில் பதும் நிசாங்கா மற்றும் குசால் மெண்டிஸ் ஆகிய இருவரும் தொடக்க வீரர்களாக இறங்குவார்கள். மிடில் ஆர்டரில் தனுஷ்கா குணதிலகா, பானுகா ராஜபக்சா, தனஞ்செயா டி சில்வா ஆகியோரும் ஆடுவார்கள். கேப்டன் தசுன் ஷனாகா பின்வரிசையில் ஃபினிஷராக ஆடுவார். ரிஸ்ட் ஸ்பின் ஆல்ரவுண்டர் வனிந்து ஹசரங்காவுடன் மற்றொரு ஸ்பின்னராக மஹீஷ் தீக்ஷனா ஆடுவார்.
ஃபாஸ்ட் பவுலர்களாக சாமிகா கருணரத்னே, துஷ்மந்தா சமீரா மற்றும் பிரமோத் மதுஷன் ஆகிய மூவரும் ஆடுவார்கள். இதுதான் இலங்கையின் வலுவான ஆடும் லெவன் காம்பினேஷனாக இருக்கும். பிரமோத் மதுஷன் ஆசிய கோப்பையில் அபாரமாக பந்துவீசியது குறிப்பிடத்தக்கது.
நமீபியா அணி கடந்த ஆண்டு தனது அறிமுக தொடரிலேயே சூப்பர் 12 சுற்றுக்கு தகுதி பெற்று அசத்தியிருந்தது. டேவிட் வைஸ், ரூபன் டிரம்பில்மான் ஆகியோரிடம் இருந்து பெரிய அளவிலான ஆட்டம் வெளிப்படக்கூடும் என அணி நிர்வாகம் நம்பிக்கை கொண்டுள்ளது. இவர்கள் இருவரும் கடந்த ஆண்டு சிறந்த திறனை வெளிப்படுத்தியிருந்தனர். இதனால் இந்த அணியின் மீதான எதிர்ப்பார்ப்பும் ரசிகர்கள் மத்தியில் உள்ளது.
அதேசமயம் இரு அணிகளும் இதுவரை ஒருமுறை மட்டுமே சர்வதேச டி20 போட்டிகளில் விளையாடியுள்ளன. அப்போட்டியில் இலங்கை அணி வெற்றிபெற்றது. இதனால் முந்தைய தோல்விக்கு நமீபியா இப்போட்டியில் பதிலடியைக் கொடுக்குமா என்ற எதிர்பார்ப்பும் உள்ளது.
உத்தேச அணி
இலங்கை: குசல் மெண்டிஸ், பதும் நிஷங்க, பானுக ராஜபக்ஷ, தனுஷ்கா குணதிலகா, சரித் அசலங்கா, தசுன் ஷனக (கே), வனிந்து ஹசரங்க, மஹீஷ் தீக்ஷனா, சமிக கருணாரத்னே, துஷ்மந்தா சமீர, மதுஷன்.
நமீபியா: ஸ்டீபன் பார்ட், லோஹண்ட்ரே லூரென்ஸ், கெர்ஹார்ட் எராஸ்மஸ் (கே), திவான் லா குக், ஜேஜே ஸ்மிட், டேவிட் வைஸ், ஜேன் கிரீன், ரூபன் ட்ரம்பெல்மேன், பெர்னார்ட் ஷால்ட்ஸ், மைக்கேல் வான் லிங்கன், பென் ஷிகோங்கோ.
ஃபேண்டஸி லெவன் டிப்ஸ்
- விக்கெட் கீப்பர் - குசால் மெண்டிஸ்
- பேட்டர்ஸ் – பானுக ராஜபக்ஷ, பதும் நிஷங்க, ஜெர்ஹார்ட் எராஸ்மஸ், ஸ்டீபன் பார்ட்
- ஆல்ரவுண்டர்கள் – ஜேஜே ஸ்மித், தசுன் ஷனக, வனிந்து ஹசரங்க
- பந்துவீச்சாளர்கள் – டேவிட் வைஸ், மஹீஷ் தீக்ஷனா, துஷ்மந்த சமீர.