இங்கிலாந்து அணிக்கெதிரான இரண்டாவது டெஸ்டில் ட்ரெண்ட் போல்ட் - ரசிகர்கள் மகிழ்ச்சி!

இங்கிலாந்து - நியூசிலாந்து அணிகளுக்கு இடையிலான இரண்டு டெஸ்ட் போட்டிகள் கொண்ட தொடர் நாளை முதல் தொடங்குகிறது. அதன்பின் நியூசிலாந்து அணி ஜூன் 18ஆம் தேதி நடைபெறும் உலக டெஸ்ட் சாம்பியன்ஷிப் இறுதி போட்டியில் இந்திய அணியை எதிர்த்து விளையாடவுள்ளது. 

இந்நிலையில், கரோனா அச்சுறுத்தல் காரணமாக மே 15ஆம் தேதி நியூசிலாந்து அணி இங்கிலாந்து சென்று தனிமைப்படுத்தப்பட்டு, அதன்பின் பயிற்சிக்கு அனுமதிக்கப்பட்டனர். 

ஆனால் நியூசிலாந்து அணியின் வேகப்பந்து வீச்சாளர் ட்ரெண்ட் போல்ட், சக அணி வீரர்களுடன் இங்கிலாந்து செல்லாததால், அவர் இத்தொடரிலிருந்து விலகுவார் என எதிர்பார்க்கப்பட்டது. ஆனால் அவர் இன்னும் இங்கிலாந்து செல்லவில்லை. 

அவர் அதன் பின்னும் அங்கு சென்றால், தனிமைப்படுத்துதல் காரணமாக அவரால் இத்தொடரில் பங்கேற்க இயலாது என கூறப்பட்டது. இந்நிலையில்,  இங்கிலாந்து அணிக்கெதிரான இரண்டாவது டெஸ்ட் போட்டியில் விளையாடுவேன் என ட்ரெண்ட் போல்ட் தெரிவித்துள்ளார்.

இதுகுறித்து பேசிய ட்ரெண்ட் போல்ட்,  “உலக டெஸ்ட் சாம்பியன்ஷிப் இறுதிப் போட்டியில் விளையாட ஆவலுடன் இருக்கிறேன்.  அதேசமயம் இங்கிலாந்துக்குச் சென்று இரண்டாவது டெஸ்ட் போட்டியிலும் விளையாடுவேன் என நம்பிகிறேன்” என்று தெரிவித்துள்ளார்.

இதனால் ட்ரெண்ட் போல்ட் இந்த வார இறுதிக்குள் இங்கிலாந்து சென்றடைவார் என எதிர்பார்க்கப்படுகிறது.