டி20 உலகக்கோப்பை: ஹாட்ரிக் எடுத்து சாதனைப் படைத்த ஹசரங்கா!

டி20 உலக கோப்பை தொடரில் நேற்று நடந்த லீக் ஆட்டத்தில் தென் ஆப்பிரிக்கா -இலங்கை அணிகள் மோதின. முதலில் பேட் செய்த இலங்கை அணி 142 ரன்கள் எடுத்தது. இதையடுத்து, 143 ரன்கள் எடுத்தால் வெற்றி என்ற இலக்குடன் தென் ஆப்பிரிக்கா அணி பேட்டிங் செய்தது.

இப்போட்டியின் 15ஆவது ஓவரை இலங்கை அணியின் வனிந்து ஹசரங்கா வீசினார். ஹசரங்கா வீசிய அந்த ஓவரின் கடைசி பந்தில், மார்க்ரம் போல்டாகி வெளியேறினார்.

அதன்பின், ஹசரங்கா 18ஆவது ஓவரை வீசினார். அந்த ஓவரின் முதல் பந்தில் தென் ஆப்பிரிக்க அணியின் கேப்டன் பவுமா கேட்ச் கொடுத்து அவுட்டானார். அடுத்து களமிறங்கிய பிரிட்டோரியஸ் அடுத்த பந்திலேயே டக்-அவுட்டாகி வெளியேறினார். இதன்மூலம் ஹசரங்கா ஹாட்ரிக் (3) விக்கெட் வீழ்த்தி அசத்தினார்.

இதன்மூலம் டி20 உலக கோப்பை போட்டியில் ஹாட்ரிக் விக்கெட் வீழ்த்திய 3ஆவது பந்துவீச்சாளர் எனும் பெருமையைப் பெற்றார். முன்னதாக, நடப்பு டி20 உலகக்கோப்பை தொடரில் அபுதாபியில் நடந்த நெதர்லாந்துக்கு எதிரான போட்டியில் அயர்லாந்து அணியின் கர்ட்டிஸ் கேம்பர் ஹாட்ரிக் விக்கெட்டுகளை கைப்பற்றி உள்ளார்.

2007 டி20 உலக கோப்பையில் வங்கதேசத்துக்கு எதிரான போட்டியில் ஆஸ்திரேலியாவின் முன்னாள் வேகப்பந்து வீச்சாளர் பிரெட் லீ ஹாட்ரிக் விக்கெட் கைப்பற்றினார்.

Also Read: T20 World Cup 2021

அதேபோல் ஒருநாள் மற்றும் டி20 கிரிக்கெட் போட்டியில் ஹாட்ரிக் விக்கெட்டுகளைக் கைப்பற்றிய நான்காவது பந்துவீச்சாளர் எனும் சாதனையை ஹசரங்கா படைத்துள்ளார். முன்னதாக இலங்கை அணியில் லசித் மலிங், திசாரா பெரேரா, ஆஸ்திரேலியாவின் பிரெட் லீ ஆகியோர் இச்சாதனையை படைத்துள்ளனர்.