பந்துவீச்சில் கம்பேக் கொடுத்த ஸ்டோக்ஸ்; முதல் பந்திலேயே ரோஹித்தை வீழ்த்தி அசத்தல்!

இந்தியா - இங்கிலாந்து அணிகளுக்கு இடையேயான 5ஆவது டெஸ்ட் போட்டி தர்மசாலாவில் நடைபெற்று வருகிறது. இப்போட்டியில் டாஸ் வென்று முதலில் பேட்டிங் செய்த இங்கிலாந்து அணியானது குல்தீப் யாதவ், ரவிச்சந்திரன் அஸ்வின் ஆகியோரது பந்துவீச்சுக்கு ஈடுகொடுக்க முடியாமல் அடுத்தடுத்து விக்கெட்டுகளை இழந்தனர். இதனால் இங்கிலாந்து அணி முதல் இன்னிங்ஸில் 218 ரன்கள் மட்டுமே எடுத்த நிலையில் ஆல் அவுட்டானது. 

இதையடுத்து முதல் இன்னிங்ஸைத் தொடர்ந்த இந்திய அணிக்கு யஷஸ்வி ஜெய்ஸ்வால் - ரோஹித் சர்மா இணை அதிரடியான தொடக்கத்தைக் கொடுத்தனர். இதில் அபாரமாக விளையாடி அரைசதம் கடந்திருந்த யஷஸ்வி ஜெய்ஸ்வால் 57 ரன்கள் சேர்த்த நிலையில் விக்கெட்டை இழந்தார். அதன்பின் ரோஹித்துடன் இணைந்த ஷுப்மன் கில்லும் அபாரமான ஆட்டத்தை வெளிப்படுத்த அணியின் ஸ்கோரும் மளமளவென உயர்ந்தது. 

இதில் தொடர்ந்து அதிரடியாக விளையாடி வந்த ரோஹித் சர்மா சர்வதேச டெஸ்ட் கிரிக்கெட்டில் தனது 12ஆவது சதத்தையும், ஷுப்மன் கில் தனது 4ஆவது சதத்தையும் பதிவுசெய்து அசத்தினர். இதன்மூலம் இந்திய அணி முதல் இன்னிங்ஸில் முன்னிலைப் பெற்றும் அசத்தியது. அதன்பின் இந்திய அணி கேப்டன் ரோஹித் சர்மா 13 பவுண்டரி, 3 சிக்சர்கள் என 103 ரன்கள் எடுத்த நிலையில் பென் ஸ்டொக்ஸ் பந்துவீச்சில் விக்கெட்டை இழந்தார்.

கடந்த ஓராண்டு மேலாகவே காயம் காரணமாக பந்துவீச முடியாமல் அணியில் ஒரு பேட்டராக மட்டுமே விளையாடி வந்த இந்த போட்டியில் முதல் முறையாக பந்துவீசினார். அதன்படி இப்போட்டியின் 62ஆவது ஓவரை வீச வந்த பென் ஸ்டோக்ஸ் முதல் பந்தை வீச அதனை எதிர்கொண்ட ரோஹித் சர்மா பந்தை சரியாக கணிக்கத்தவறினார். இதன்மூலம் அவர் அந்த பந்தில் க்ளீன் போல்டாகி பெவிலியனுக்கு திரும்பினார். 

குறிப்பாக ரோஹித் சர்மா - ஷுப்மன் கில் கூட்டணியை பிரிக்க முடியாமல் இங்கிலாந்து பந்துவீச்சாளர்கள் தடுமாறி வந்த நிலையில் பென் ஸ்டோக்ஸ் தனது முதல் பந்திலேயே ரோஹித் சர்மாவை க்ளீன் போல்டாக்கியது ரசிகர்களை ஆச்சரியமடைய வைத்தது. இந்நிலையில் பென் ஸ்டோக்ஸ் பந்துவீச்சில் ரோஹித் சர்மா ஆட்டமிழந்த காணொளி இணையத்தில் வைரலாகி வருகிறது.