வெஸ்ட் இண்டீஸ் அணி அடுத்த மாதம் ஆஸ்திரேலிய அணியில் சுற்றுப்பயணம் மேற்கொண்டு இரண்டு போட்டிகள் கொண்ட டெஸ்ட் தொடரில் விளையாடுகிறது. இதில் முதல் டெஸ்ட் பெர்த்திலும், 2ஆவது டெஸ்ட் போட்டி அடிலெய்டிலும் நடைபெறுகிறது.
இந்நிலையில் இதற்கான பயிற்சி ஆட்டமாக ஆஸ்திரேலியாவின் நியூ சவுத்வேல்ஸ் அணியுடன் வெஸ்ட் இண்டீஸ் அணி மோதியது. கான்பெர்ராவில் நடைபெற்ற 3 நாள் பயிற்சி ஆட்டத்தில் வெஸ்ட் இண்டீஸ் அணி முதலில் பேட் செய்து 9 விக்கெட்டுகள் இழப்புக்கு 424 ரன்கள் எடுத்தது. தொடர்ந்து விளையாடிய நியூசவுத்வேல்ஸ் அணி வெஸ்ட் இண்டீஸ் பந்து வீச்சை புரட்டி எடுத்து 97 ஓவர்களில் 426/4 என்று டிக்ளேர் செய்தனர்.
இதைத்தொடர்ந்து இரண்டாவது இன்னிங்ஸில் வெஸ்ட் இண்டீஸ் அணி 114/4 என்று தடுமாற இப்போட்டி டிரா ஆனது. இதில், வெஸ்ட் இண்டீஸ் அணியின் பரிதாபம் என்னவெனில், நியூசவுத்வேல்ஸ் அணியின் கேப்டன் பிளேக் மெக்டொனால்டு என்ற 24 வயது வீரர் 265 பந்துகளில் 177 ரன்களை 15 பவுண்டரிகள் 5 சிக்சர்களுடன் விளாசினார். மற்றொரு வீரரான ஒலிவர் டேவிஸுக்கு வயது 22 மட்டுமே, இவர் 106 பந்துகளில் 14 பவுண்டரி 3 சிக்சர்களுடன் 115 ரன்கள் எடுத்து விளாசித்தள்ள, ஜஸ்டின் அவென்டனோ என்ற வீரர் 54 ரன்கள் எடுத்தார்.
இந்த 3 வீரர்கள் யாரெனில், இன்னும் முதல் தரக் கிரிக்கெட்டே விளையாடாத வீரர்கள், வெஸ்ட் இண்டீஸின் பந்து வீச்சின் பலவீனத்தைக் குறிக்கும் பிரதான விஷயமாக ஆஸ்திரேலியாவில் பேசப்பட்டு வருகிறது. முதல் தர கிரிக்கெட்டே விளையாடாத வீரர்களே கிமார் ரோச், ஜெய்டன் சீல்ஸ், அல்ஜாரி ஜோசப் மற்றும் ஆஃப் ஸ்பின்னர் ரோஸ்டன் சேஸ் ஆகியோர் கொண்ட பந்து வீச்சைப் புரட்டி எடுக்கிறார்கள் என்றால், ஆஸ்திரேலியாவுக்கு எதிரான டெஸ்ட் கிரிக்கெட்டில் வார்னர், கவாஜா, டிராவிஸ் ஹெட், ஸ்மித், லபுஷாக்னே ஆகியோர் கொண்ட பேட்டிங் வெஸ்ட் இண்டீஸை என்ன செய்யும் என்ற பேச்சு ஆஸ்திரேலியாவில் எழுந்துள்ளது.
ஏற்கெனவே டி20 உலகக்கோப்பைக்குத் தகுதி பெறாமல் வெளியேறிய வெஸ்ட் இண்டீஸ் அணியை அங்கு டெஸ்ட் தொடருக்காக அழைத்ததே கடும் கேலிக்கும் கிண்டலுக்கும் உரியதாக ஆஸ்திரேலிய ஊடகங்களால் பார்க்கப்பட்டு வருகிறது. இந்த கத்துக்குட்டி அணிக்கு எதிராக கிமார் ரோச் 34 ரன்கள் கொடுத்து 13 ஓவர்களில் ஒரு விக்கெட்டைக் கூட வீழ்த்த முடியவில்லை. தற்போதைய, வெஸ்ட் இண்டீஸின் சிறந்த வேகப்பந்து வீச்சாளராகிய ஜெய்டன் சீல்ஸ் 14 ஓவர்கள் வீசி, விக்கெட்டை வீழ்த்த முடியவில்லை. அல்ஜாரி ஜோசப் 13 ஓவர்களில், 54 ரன்கள் விளாசப்பட, ராஸ்டன் சேஸ் 23 ஓவர்களில் 117 ரன்கள் விளாசப்பட்டு ஒரேயொரு விக்கெட்டை மட்டும் கைப்பற்றியுள்ளார்.
வெஸ்ட் இண்டீஸின் முன்னணி பவுலர்கள் விக்கெட் எடுக்கவில்லை எனில், ஆஸ்திரேலியாவுக்கு எதிராக எப்படி விக்கெட்டை எடுக்க முடியும்? ஆஸ்திரேலிய பேட்டர்கள் இந்தத் தொடரில் சாதனைகள் பலவற்றை உடைத்தெறியப் போகிறார்கள் என்று எதிர்பார்க்கப்படுகிறது.