UAE vs AFG, 3rd T20I: ஸத்ரான், ஜானத் அதிரடியில் தொடரை வென்றது ஆஃப்கானிஸ்தான்!

ஐக்கிய அரபு அமீரக அணிக்கெதிரான கடைசி டி20 போட்டியில் ஆஃப்கானிஸ்தான் அணி 6 விக்கெட் வித்தியாசத்தில் வெற்றிபெற்று, 2-1 என்ற கணக்கில் தொடரையும் கைப்பற்றியது.

Afghanistan win by 6 wickets to seal the three-match series 2-1! (Image Source: Google)

ஐக்கிய அரபு அமீரகத்தில் சுற்றுப்பயணம் செய்துவரும் ஆஃப்கானிஸ்தான் அணி 3 போட்டிகள் கொண்ட டி20 தொடரில் விளையாடி வருகிறது. இதில் நடைபெற்று முடிந்த இரண்டு போட்டிகளில் இரு அணிகளும் தலா ஒரு வெற்றியைப் பெற்று 1-1 என்ற கணக்கில் சமனில் உள்ளது. இந்நிலையில் தொடரின் வெற்றியாளரைத் தீர்மானிக்கும் கடைசி டி20 போட்டி இன்று துபாயில் நடைபெற்று வருகிறது. 

இப்போட்டியில் டாஸ் வென்ற ஆஃப்கானிஸ்தான் அணி முதலில் பந்துவீச தீர்மானித்தது. அதன்படி களமிறங்கிய ஐக்கிய அரபு அமீரக அணியின் தொடக்க வீரர்கள் முகமது வாசீம் - விரிட்டியா அரவிந்த் இணை அபாரமான ஆட்டத்தை வெளிப்படுத்தி அணிக்கு நல்ல அடித்தளத்தை அமைத்தனர். 

தொடர்ந்து பவுண்டரியும் சிக்சர்களுமாக விளாசிய முகமது வசீம் அரைசதம் கடந்து, 50 பந்துகளில் 8 பவுண்டரி, 3 சிக்சர்கள் என 75 ரன்களைச் சேர்த்து ஆட்டமிழந்தார். இதையடுத்து அரவிந்தனும் தனது அரைசதத்தைப் பதிவுசெய்ய, பின்னர் களமிறங்கிய பசில் ஹமீத் 3, ரோஹன் முஸ்தஃபா ரன்கள் ஏதுமின்றி ரஷித் கான் பந்துவீச்சில் அடுத்தடுத்து விக்கெட்டுகளை இழந்தனர். 

பின் தொடர்ந்து அதிரடியான ஆட்டத்தை வெளிப்படுத்தி வந்த விரித்யா அரவிந்த் 7 பவுண்டரி, ஒரு சிக்சர் என 59 ரன்களில் ஆட்டமிழக்க, அடுத்து வந்த ஸவர் ஃபரித் முதல் பந்திலேயே விக்கெட்டை இழந்தார். இறுதியில் ஐக்கிய அரபு அமீரக அணி 20 ஓவர்கள் முடிவில் 6 விக்கெட் இழப்பிற்கு 163 ரன்களைச் சேர்த்தது. ஆஃப்கானிஸ்தான் தரப்பில் ரஷித் கான்,குல்புதீன் நைப் தலா 2 விக்கெட்டுகளைக் கைப்பற்றினர்.

இதையடுத்து இலக்கை நோக்கி களமிறங்கிய ஆஃப்கானிஸ்தான் அணியில் ரஹ்மனுல்லா குர்பாஸ் 20 ரன்களிலும், குல்புதின் நைப் ரன்கள் ஏதுமின்றியும், அஃப்சார் ஸஸாய் 13 ரன்னிலும், நஜிபுல்லா ஸத்ரான் ஒரு ரன் என அடுத்தடுத்து விக்கெட்டுகளை இழந்தனர். பின்னர் ஜோடி சேர்ந்த இப்ராஹிம் ஸத்ரான் - கரிம் ஜானத் இணை அபார ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். இதில் பவுண்டரியும், சிக்சர்களுமாக விளாசிய இருவரும் அரைசதம் கடந்து அசத்தினர். 

இதில் இறுதிவரை ஆட்டமிழக்காமல் இருந்த இப்ராஹிம் ஸத்ரான் 51 பந்துகளில் 5 பவுண்டரி, ஒரு சிக்சர் என 60 ரன்களுடனும், கரிம் ஜானத் 22 பந்துகளில் 4 பவுண்டரி, 5 சிக்சர்கள் என 56 ரன்களை விளாசினார். இதன்மூலம் ஆஃப்கானிஸ்தான் அணி 19.1 ஓவர்களில் இலக்கை எட்டி, 6 விக்கெட் வித்தியாசத்தில் ஐக்கிய அரபு அமீரக அணியை வீழ்த்தி வெற்றிபெற்றது. இந்த வெற்றியின் மூலம் ஆஃப்கானிஸ்தான் அணி 2-1 என்ற கணக்கில் டி20 தொடரை வென்றது.

Win Big, Make Your Cricket Tales Now