AUS vs SL, 1st T20I: ஹசில்வுட் பந்துவீச்சில் வீழ்ந்தது இலங்கை!

இலங்கைக்கு எதிரான முதல் டி20 போட்டியில் ஆஸ்திரேலிய அணி 20 ரன்கள் வித்தியாசத்தில் வெற்றிபெற்று அசத்தியது.

ஆஸ்திரேலியா - இலங்கை அணிகளுக்கு இடையேயான முதல் டி20 போட்டி சிட்னியில் இன்று நடைபெற்றது . இப்போட்டியில் டாஸ் வென்ற இலங்கை அணி முதலில் பந்துவீச தீர்மானித்தது. 

அதன்படி களமிறங்கிய ஆஸ்திரேலிய அணி பென் மெக்டர்மோட்டின் அதிரடியான ஆட்டத்தின் மூலம் 20 ஓவர்கள் முடிவில் 149 ரன்களைச் சேர்த்தது.

இதில் அதிகபட்சமாக பென் மெக்டர்மோட் 53 ரன்களைச் சேர்த்தார். இலங்கை அணி தரப்பில் வநிந்து ஹசரங்கா 3 விக்கெட்டுகளைக் கைப்பற்றினார். 

இதையடுத்டு இலக்கை துரத்திய இலங்கை அணி ஆரம்பத்திலேயே குணத்திலகா, அவிஷ்கா ஃபெர்னாண்டோ, சரித் அசலங்கா, ஹசரங்கா ஆகியோரது விக்கெட்டுகளை இழந்தது. 

மறுமுனையில் பொறுப்பான ஆட்டத்தை வெளிப்படுத்தி வந்த பதும் நிஷங்காவும் 36 ரன்களில் வெளியேறினார். இதற்கிடையில் மழைக் குறுக்கிட்டதால் ஆட்டம் 19 ஓவர்களாக குறைக்கப்பட்டு இலங்கைக்கு 142 ரன்கள் இலக்காக நிர்ணயிக்கப்பட்டது.

ஆனாலும் ஆஸ்திரேலியாவின் பந்துவீச்சை எதிர்கொள்ள முடியாமல் இலங்கை வீரர்கள் அடுத்தடுத்து விக்கெட்டுகளை இழந்தனர். 

இதனால் 19 ஓவர்கள் முடிவில் இலங்கை அணி 8 விக்கெட்டுகளை இழந்து 122 ரன்களை மட்டுமே எடுத்தது. ஆஸ்திரேலிய தரப்பில் ஜோஷ் ஹசில்வுட் 4 விக்கெட்டுகளையும், ஆடம் ஸாம்பா 3 விக்கெட்டுகளையும் வீழ்த்தினர். 

இதன்மூலம் ஆஸ்திரேலிய அணி டக்வொர்த் லூயிஸ் முறைப்படி 20 ரன்கள் வித்தியாசத்தில் அபார வெற்றிபெற்றது.