பிபிஎல் 2022: மேத்யூ ஷார்ட் அதிரடியில் ஸ்டிரைக்கர்ஸ் அபார வெற்றி!

ஹாபர்ட் ஹரிக்கேன்ஸ் அணிக்கெதிரான பிபிஎல் லீக் ஆட்டத்தில் அடிலெய்ட் ஸ்டிரைக்கர்ஸ் அணி 7 விக்கெட் வித்தியாசத்தில் வெற்றிபெற்றது.

பிக் பேஷ் லீக் டி20 தொடரில் இன்று நடைபெற்ற 35ஆவது லீக் ஆட்டத்தில் அடிலெய்ட் ஸ்டிரைக்கர்ஸ் - ஹாபர்ட் ஹரிக்கேன்ஸ் அணிகள் பலப்பரீட்சை நடத்தின. இதில் டாஸ் வென்ற ஸ்டிரைக்கர்ஸ் அணி முதலில் பந்துவீச தீர்மானித்தது. 

அதன்படி களமிறங்கிய ஹரிக்கேன்ஸ் அணியில் டி ஆர்சி ஷார்டை தவிர மற்ற வீரர்கள் சோபிக்க தவறினர். இதனால் 19.5 ஓவர்களிலேயே ஹரிக்கேன்ஸ் அணி அனைத்து விக்கெட்டுகளையும் இழந்து 126 ரன்களை மட்டுமே எடுத்தது. 

இதில் அதிகபட்சமாக டி ஆர்சி ஷார்ட் 32 ரன்களைச் சேர்த்தார். ஸ்டிரைக்கர்ஸ் அணி தரப்பில் பீட்டர் சிடில் 5 விக்கெட்டுகளைக் கைப்பற்றி அசத்தினார். 

இதையடுத்து எளிய இலக்கை துரத்திய ஸ்டிரைக்கர்ஸ் அணிக்கு மேத்யூ ஷார்ட் அதிரடியான தொடக்கத்தைக் கொடுத்தார். தொடர்ந்து அபாரமான ஆட்டத்தை வெளிப்படுத்தி வந்த ஷார்ட் அரைசதம் கடந்து அணியின் வெற்றிக்கு உதவினார். 

இதன்மூலம் 15.1 ஓவர்களிலேயே ஸ்டிரைக்கர்ஸ் அணி இலக்கை எட்டி 7 விக்கெட் வித்தியாசத்தில் ஹரிக்கேன்ஸ் அணியை வீழ்த்தியது. இதில் இறுதிவரை ஆட்டமிழக்காமல் 72 ரன்களைச் சேர்த்த மேத்யூ ஷார்ட் ஆட்டநாயகனாகத் தேர்வு செய்யப்பட்டார்.