பிபிஎல் 2022: ஹூக்ஸ், ஓ கீஃப் அசத்தல்; சிக்சர்ஸ் அபார வெற்றி!

சிட்னி சிக்சர்ஸ் அணிக்கெதிரான பிபிஎல் லீக் ஆட்டத்தில் சிட்னி தண்டர் அணி 60 ரன்கள் வித்தியாசத்தில் தோல்வியடைந்தது.

பிக் பேஷ் லீக் டி20 தொடரில் இன்று நடைபெற்ற 50ஆவது போட்டியில் சிட்னி சிக்சர்ஸ் - சிட்னி தண்டர் அணிகள் மோதின. இதில் டாஸ் வென்ற தண்டர் அணி முதலில் பந்துவீச தீர்மானித்தது.

அதன்படி களமிறங்கிய சிட்னி சிச்கர்ஸ் அணி ஜோஷ் பிலிப்பே, டேனியல் ஹூக்ஸ் ஆகியோரது அபார அரைசதத்தின் காரணமாக 20 ஓவர்கள் முடிவில் 5 விக்கெட்டுகளை இழந்து 197 ரன்களைச் சேர்த்தது.

இதில் அதிகபட்சமாக டேனியல் ஹூக்ஸ் 66 ரன்களையும், ஜோஷ் பிலிப்பே 57 ரன்களையும் சேர்த்தனர். தண்டர் அணி தரப்பில் டேனியல் சம்ஸ், மெக்கண்ட்ரூ தலா 2 விக்கெட்டுகளைக் கைப்பற்றினர்.

இதையடுத்து கடின இலக்கை துரத்திய சிட்னி தண்டர் அணி சீரான இடைவேளையில் விக்கெட்டுகளை இழந்து தடுமாறியது. இருப்பினும் கேப்டன் கிறிஸ் கிரீன் சிறப்பாக விளையாடி அரைசதம் கடந்து ஆறுதலளித்தார். 

ஆனாலும் 20 ஓவர்கள் முடிவில் அந்த அணியால் 9 விக்கெட் இழப்பிற்கு 137 ரன்களை மட்டுமே எடுக்க முடிந்தது. சிக்சர்ஸ் அணி தரப்பில் ஸ்டீவ் ஓகீஃப் 4 விக்கெட்டுகளைக் கைப்பற்றி அசத்தினார். 

இதன்மூலம் சிட்னி சிக்சர்ஸ் அணி 60 ரன்கள் வித்தியாசத்தில் சிட்னி தண்டரை வீழ்த்தி அபார வெற்றிபெற்றது.