சிபிஎல் 2022: கயானாவை வீழ்த்தி இறுதிப்போட்டிக்குள் நுழைந்தது ஜமைக்கா!

கயானா அமேசன் வாரியர்ஸ் அணிக்கெதிரான குவாலிஃபையர் ஆட்டத்தில் ஜமைக்கா தலாவாஸ் அணி 37 ரன்கள் வித்தியாசத்தில் வெற்றிபெற்று இறுதிப்போட்டி முன்னேறியது.

CPL 2022: Shamarh Brooks powers Jamaica Tallawahs to CPL final (Image Source: Google)

வெஸ்ட் இண்டீஸின் உள்ளூர் கிரிக்கெட் தொடரான கரீபியன் பிரீமியர் லீக் தொடர் தற்போது இறுதிக்கட்டத்தை எட்டியுள்ளது. இதில் நேற்று நடைபெற்ற இரண்டாவது குவாலிஃபையர் லீக் ஆட்டத்தில் ஜமைக்கா தலாவாஸ் - கயானா அமேசன் வாரியர்ஸ் அணிகள் பலப்பரீட்சை நடத்தின.

இப்போட்டியில் டாஸ் வென்ற கயானா அணி முதலில் பந்துவீசுவதாக தீர்மானித்தது. அதன்படி களமிறங்கிய ஜமைக்கா தலாவாஸ் அணியில் பிராண்டன் கிங்ஸ், கென்னர் லூயிஸ் ஆகியோர் சொற்ப ரன்களில் ஆட்டமிழந்து பெவிலியன் திரும்பினர். 

இதையடுத்து ஜோடி சேர்ந்த ஷமாரா ப்ரூக்ஸ் - ரோவ்மன் பாவெல் இணை அதிரடியாக விளையாடி அணியின் ஸ்கோரை உயர்த்தினர். இதில் அபாரமாக விளையாடிய ஷமாரா ப்ரூக்ஸ் சதமடித்ததுடன், 52 பந்துகளில் 8 சிக்சர், 7 பவுண்டரிகள் என 109 ரன்களைச் சேர்த்தார்.

இறுதியில் இமாத் வாசிம் 15 பந்துகளில்ல் 3 சிக்சர், 4 பவுண்டரிகள் என 41 ரன்களை விளாசி அசத்தினார். இதன்மூலம் 20 ஓவர்கள் முடிவில் ஜமைக்கா தலாவாஸ் அணி 4 விக்கெட் இழப்பிற்கு 226 ரன்களைச் சேர்த்து அசத்தியது.

அதன்பின் இமாலய இலக்கை நோக்கி களமிறங்கிய கயானா அமேசன் வாரியர்ஸ் அணியில் பால் ஸ்டிர்லிங் 2 ரன்களிலும், ரஹ்மனுல்லா குர்பாஸ் 22, ஷாய் ஹோப் 31 ரன்களிலும் ஆட்டமிழந்து பெவிலியன் திரும்பினர். 

அதன்பின் களமிறங்கிய ஷாகிப் அல் ஹசன், ஹெட்மையர், ஷெஃபெர்ட் என அதிரடி வீரர்களும் சொற்ப ரன்களுக்கு ஆட்டமிழக்க, மறுமுனையில் தனி ஆளாக போராடிய கிமோ பால் அரைசதம் கடந்து, 57 ரன்களில் ஆட்டமிழந்தார். 

இறுதியில் அந்த அணி 8 விக்கெட்டுகளை இழந்து 189 ரன்களை மட்டுமே சேர்த்தது. இதன்மூலம் ஜமைக்கா தலாவாஸ் அணி 37 ரன்கள் விட்த்தியாசத்தில் கயானா அமேசன் வாரியர்ஸ் அணியை வீழ்த்தி வெற்றிபெற்றதுடன், சிபிஎல் தொடரின் இறுதிப்போட்டிக்கு முன்னேறியது.

Win Big, Make Your Cricket Tales Now