கரோனா தடுப்பூசி: ஆர்வம் காட்டும் இந்திய கிரிக்கெட் வீரர்கள்!

இந்திய கிரிக்கெட் வீரர்கள் தீபக் சஹார், சித்தார்த் கவுல் ஆகியோர் இன்று தங்களது முதல் டோஸ் கரோனா தடுபூசியை செலுத்தி கொண்டனர்.

நாடு முழுவதும் கரோனா பரவல் அதிகரித்து வரும் நிலையில், பொதுமக்கள் அனைவருக்கும் தடுப்பூசி போடும் பணிகள் முழுவீச்சில் நடைபெற்று வருகிறது. 

இதன் ஒரு பகுதியாக இந்திய கிரிக்கெட் அணியைச் சேர்ந்த வீரர்கள் தடுப்பூசி போட்டு கொள்ள ஆர்வம் காட்டி வருகின்றனர். 

இந்நிலையில் இந்திய வேகப்பந்து வீச்சாளர்கள் தீபக் சஹார், சித்தார்த் கவுல் ஆகியோர் இன்று தங்களது முதல் தவணை கரோனா தடுப்பூசியை செலுத்தி கொண்டனர். 

இதுகுறித்து தனது ட்விட்டர் பக்கத்தில் பதிவிட்டுள்ள தீபக் சஹார்,“எனது முதல் டோஸ் கோவிட் தடுப்பூசி இன்று செலுத்தப்பட்டது. நீங்கள் அனைவருக்கும் விரைவில் தடுப்பூசி போடுமாறு கேட்டுக் கொள்கிறேன். எங்களை கவனித்துக் கொண்ட முன் களப் பணியாளர்களுக்கு ஒரு பெரிய நன்றி. இந்த கோவிட் தொற்றிலிருந்து விரைவில் குணமடைவோம் என்று நம்புகிறேன்” என பதிவிட்டுள்ளார்.

முன்னதாக இந்திய அணி கேப்டன் விராட் கோலி, அஜிங்கியா ரஹானே, இஷாந்த் சர்மா, உமேஷ் யாதவ் ஆகியோர் கரோனா தடுப்பூசி செலுத்தி கொண்டது குறிப்பிடத்தக்கது.

Win Big, Make Your Cricket Tales Now