புதிய பரிமாணத்தில் தினேஷ் கார்த்திக்; வெளியான தகவலால் ரசிகர்கள் மகிழ்ச்சி!
ஐசிசி உலக டெஸ்ட் சாம்பியன்ஷிப் இறுதிப் போட்டியில் இந்திய அணி வீரர் தினேஷ் கார்த்திக் வர்ணனையாளராக செயல்படவுள்ளதாக தகவல்கள் வெளியாகியுள்ளது.
ஐசிசி உலக டெஸ்ட் சாம்பியன்ஷிப் ஃபைனல் வரும் ஜூன் 18ஆம் தேதி முதல் ஜூன் 22ஆம் தேதி வரை இங்கிலாந்தின் சவுத்தாம்ப்டன் நகரில் நடக்கிறது. முதல் முறையாக நடத்தப்படும் டெஸ்ட் சாம்பியன்ஷிப் தொடரின் இறுதிப் போட்டியில் விராட் கோலி தலைமையிலான இந்திய அணியும், கேன் வில்லியம்சன் தலைமையிலான நியூசிலாந்து அணியும் மோதுகின்றன.
கரோனா அச்சுறுத்தலால் வீரர்கள், பயிற்சியாளர்கள், வர்ணனையாளர்கள் என அனைவருமே 10 நாட்கள் தனிமைப்படுத்தல் மற்றும் பயோ பபுள் ஆகிய விதிகளை பின்பற்றி ஆக வேண்டிய கட்டாயத்தில் உள்ளனர்.
Trending
இதன் காரணமாக உலக டெஸ்ட் சாம்பியன்ஷிப் இறுதி போட்டியில் வர்ணனை செய்ய இந்தியா மற்றும் நியூசிலாந்தை சேர்ந்த பல முன்னணி வர்ணனையாளர்கள் தயக்கம் காட்டியதையடுத்து, இந்தியா சார்பில் சுனில் கவாஸ்கருடன், இந்திய அணி வீரர் தினேஷ் கார்த்திக் வர்ணனை செய்ய உள்ளதாக தகவல்கள் வெளியாகியுள்ளன.
இந்தியாவின் மற்ற முன்னணி வர்ணனையாளர்கள் இங்கிலாந்து செல்ல மறுத்ததையடுத்து, கவாஸ்கர் மற்றும் தினேஷ் கார்த்திக் ஆகிய இருவரும் இந்திய வர்ணனையாளர்களாக செல்கின்றனர். நியூசிலாந்து சார்பில் சைமன் டௌல் வர்ணனை செய்யவுள்ளார். அதேபோல் இந்த மூவரைத் தவிர, நடுநிலை வர்ணனையாளர்கள் மைக் அதெர்ட்டான் மற்றும் நாசர் ஹுசைன் ஆகிய இருவரும் வர்ணனை செய்ய உள்ளதாகவும் தகவல்கள் வெளியாகியுள்ளன.
இத்தகவலை அறிந்த கிரிக்கெட் ரசிகர்கள் ஒரு பக்கத்தில் சோகத்தில் இருந்தாலும் மற்றொரு பக்கம் மகிழ்ச்சியை வெளிப்படுத்தி வருகின்றனர். ஏனெனில் நம்பதகுந்த பேட்ஸ்மேன்களில் ஒருவரான தினேஷ் கார்த்திக்கு கடந்த சில ஆண்டுகளாக இந்திய அணியில் விளையாடும் வாய்ப்பு மறுக்கப்பட்டு வருகிறது. இதன் காரணமாகவே அவர் வர்ணனையாளராக செயல்பட ஒப்புக்கொண்டிருக்கிறார் என்றும் தகவல்கள் வெளியாகின்றன.
Win Big, Make Your Cricket Tales Now
