ENG vs SA, 3rd T20I: ஷம்ஸி சுழலில் சுருண்டது இங்கிலாந்து; தொடரை வென்றது தென் ஆப்பிரிக்கா!

இங்கிலாந்துக்கு எதிரான மூன்றாவது டி20 போட்டியில் தென் ஆப்பிரிக்க அணி 90 ரன்கள் வித்தியாசத்தில் வெற்றிபெற்றதுடன், 2-1 என்ற கணக்கில் டி20 தொடரையும் வென்றது.

ENG vs SA, 3rd T20I: South Africa have sealed the series (Image Source: Google)

தென் ஆப்பிரிக்க அணி இங்கிலாந்தில் சுற்றுப்பயணம் செய்து விளையாடிவருகிறது. இதில் 3 டி20 போட்டிகள் கொண்ட தொடரின் முதலிரண்டு போட்டிகளில் இரு அணிகளும் தலா ஒரு வெற்றியை பெற்றதால் தொடர் 1-1 என சமனில் உள்ள நிலையில், தொடரின் முடிவை தீர்மானிக்கும் கடைசி டி20 போட்டி சௌத்தாம்ப்டனில் இன்று நடந்தது. இப்போட்டியில் டாஸ் வென்ற இங்கிலாந்து அணி ஃபீல்டிங்கை தேர்வு செய்தது.

அதன்படி முதலில் பேட்டிங் ஆடிய தென் ஆப்பிரிக்க அணியின் தொடக்க வீரர் டி காக் ரன்னே அடிக்காமல் டக் அவுட்டானாலும், மற்றொரு தொடக்க வீரரான ரீஸா ஹென்ரிக்ஸ் அதிரடியாக பேட்டிங் ஆடி அரைசதம் அடித்தார். 50 பந்தில் 9 பவுண்டரிகளுடன் 70 ரன்களை குவித்தார். 

3ஆம் வரிசையில் இறங்கிய ரிலே ரொஸ்ஸோவ் அதிரடியாக ஆடி 18 பந்தில் 31 ரன்கள் அடித்தார். கேப்டன் டேவிட் மில்லர் 9 பந்தில் 22 ரன்கள் அடித்தார். மார்க்ரம் பொறுப்புடன் நிலைத்து ஆடி அரைசதம் அடித்தார். மார்க்ரம் 36 பந்தில் 5 பவுண்டரிகளுடன் 51 ரன்கள் அடித்து கடைசி வரை களத்தில் நின்றார். இதன்மூலம் தென் ஆப்பிரிக்க அணி 20 ஓவரில் 191 ரன்களை குவித்தது. 

இதையடுத்து கடின இலக்கை நோக்கி களமிறங்கிய இங்கிலாந்து அணியில் ஜேசன் ராய் 17 ரன்னிலும், ஜோஸ் பட்லர் 14 ரன்களிலும் ஆட்டமிழக்க, அடுத்து வந்த டேவிட் மாலனும் 7 ரன்களுக்கு நடையைக் கட்டினார். 

இதையடுத்து களமிறங்கிய ஜானி பேர்ஸ்டோவ் நிதான ஆட்டத்தை வெளிப்படுத்திய போதிலும் 27 ரன்களில் கேஷவ் மஹாராஜிடம் விக்கெட்டை பறிக்கொடுத்தார். அதன்பின் களமிறங்கிய இங்கிலாந்து அணி வீரர்கள் தப்ரைஸ் ஷம்ஸியின் சுழலில் சிக்கி அடுத்தடுத்து விக்கெட்டுகளை இழந்து வெளியேறினர்.

இதனால் 16.1 ஓவர்களில் இங்கிலாந்து அணி அனைத்து விக்கெட்டுகளையும் இழந்து 101 ரன்களை மட்டுமே எடுத்தது. தென் ஆப்பிரிக்க அணி தரப்பில் தப்ரைஸ் ஷம்ஸி 5 விக்கெட்டுகளைக் கைப்பற்றி அசத்தினார்.

இதன்மூலம் தென் ஆப்பிரிக்க அணி 90 ரன்கள் வித்தியாசத்தில் இங்கிலாந்தை வீழ்த்தியதுடன், டி20 தொடரை 2-1 என்ற கணக்கில் கைப்பற்றி அசத்தியது.