மோசமான உலக சாதனையைப் படைத்த ஹீலி மேத்யூஸ்!

மோசமான உலக சாதனையைப் படைத்த ஹீலி மேத்யூஸ்! (Image Source: Google)

மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் நேற்று நடைபெற்ற லீக் போட்டியில் ஸ்காட்லாந்து மகளிர் அணி 11 ரன்கள் வித்தியாசத்தில் வெஸ்ட் இண்டீஸ் மகளிர் அணியை வீழ்த்தி த்ரில் வெற்றியைப் பதிவுசெய்து அசத்தியுள்ளது. 

இந்நிலையில் ஸ்காட்லாந்துக்கு எதிரான போட்டியில்  சிறப்பாக செயல்பட்ட போதிலும், வெஸ்ட் இண்டீஸ் மகளிர் கிரிக்கெட் அணியின் கேப்டனும் நட்சத்திர ஆல்ரவுண்டருமான ஹேலி மேத்யூஸ் தேவையற்ற உலக சாதனையைப் பதிவு செய்தார். இப்போட்டியில் பந்துவீச்சில் சிறப்பாக செயல்பட்ட மேத்யூஸ் 4 விக்கெட்டுகளை வீழ்த்தினார். அதன்பின் அவர் பேட்டிங்கிலும் சிறப்பாக செயல்பட்ட அவர், சதமடித்ததுடன் 114 ரன்கள் எடுத்து ஆட்டமிழக்காமல் இருந்தார்.

இதன் காரணமாக இப்போட்டியின் ஆட்டநாயகி விருதையும் அவர் கைப்பற்றி அசத்தி இருந்தார். இந்நிலையில் 54 ஆண்டுகால ஒருநாள் கிரிக்கெட் வரலாற்றில் பேட்டிங்கில் சதமும், பந்துவீச்சில் 4 விக்கெட்டுகளையும் வீழ்த்திய முதல் வீராங்கனை எனும் சாதனையை ஹீலி மேத்யூஸ் படைத்தார். இருப்பினும் அவரது அணியானது இப்போட்டியில் தோவ்லியைத் தழுவியது. இதன்மூலம் ஒரே போட்டியில் சதம் அடித்து நான்கு விக்கெட்டுகளை வீழ்த்தியும், அந்த அணி தோல்வியைத் தழுவியது இதுவே முதல் முறையாகும்.

இது தவிர, மகளிர் ஒருநாள் சர்வதேச கிரிக்கெட்டில் தோல்வியடைந்த போட்டிகளில் அதிக ஆட்ட நாயகி விருதுகளை வென்ற வீராங்கனை எனும் மோசமான சாதனையையும் ஹீலி மேத்யூஸ் பெற்றுள்ளார். அவரது அணி தோல்வியடைந்த போதிலும், அவர் இந்த விருதை வெல்வது இது ஐந்தாவது முறையாகும். இந்தப் பட்டியலில், அவர் தனது சக நாட்டவரான ஸ்டெஃபனி டெய்லரை முந்தி முதலிடத்தைப் பிடித்துள்ளார் என்பது குறிப்பிடத்தக்கது.

மகளிர் சர்வதேச கிரிக்கெட்டில் தோல்வியடைந்த அட்டத்தில் அதிக ஆட்ட நாயகி விருதுகள்

• 5-ஹேலி மேத்யூஸ்
• 4-ஸ்டஃபானி டெய்லர்
• 2-எமி சாட்டர்த்வைட்
• 2-நிக்கோலா பிரவுன்
• 2-கிளேர் டெய்லர்

இந்த போட்டி குறித்து பேசினால், டாஸை இழந்து முதலில் பேட்டிங் செய்த ஸ்காட்லாந்து மகளிர் அணியில் அதிகபட்சமாக சாரா பிரைஸ் அரைசதம் கடந்து அசத்தியதுடன், 55 ரன்களையும், மேகன் மெக்கல் 45 ரன்களையும் சேர்த்ததை தவிர்த்து மற்ற வீராங்கனைகள் சோபிக்க தவறினர். இதனால் ஸ்காட்லாந்து மகளிர் அணி 45 ஓவர்களில் அனைத்து விக்கெட்டுகளையும் இழந்து 244 ரன்களைச் சேர்த்தது. விண்டீஸ் தரப்பில் ஹெய்லி மேத்யூஸ் 4 விக்கெட்டுகளை கைப்பற்றினார். 

அதன்பின் இலக்கை நோக்கி விளையாடிய வெஸ்ட் இண்டீஸ் மகளிர் அணியில் கேப்டன் ஹீலி மேத்யூஸ் சதமடித்து அசத்தியதுடன் இறுதிவரை ஆட்டமிழக்காமல் 114 ரன்களைச் சேர்த்த நிலையிலும், அணியில் உள்ள மற்ற வீராங்கனைகள் ரன்களைச் சேர்க்க தவறினர். இதனால் அந்த அணி 46.2 ஓவரில் அனைத்து விக்கெட்டுகளையும் இழந்து 233 ரன்களுக்கு ஆல் அவுட்டானது. இதன்மூலம் ஸ்காட்லாந்து மகளிர் அணி வெற்றிபெற்று அசத்தியுள்ளது.