ஐசிசி உலகக்கோப்பை 2023: வங்கதேசத்தை 204 ரன்களில் சுருட்டியது பாகிஸ்தான்!
பாகிஸ்தான் அணிக்கெதிரான ஒருநாள் உலகக்கோப்பை லீக் போட்டியில் முதலில் பேட்டிங் செய்த வங்கதேச அணி 204 ரன்களில் ஆல் அவுட்டானது.
ஐசிசி ஒருநாள் உலகக்கோப்பை கிரிக்கெட் தொடரின் லீக் போட்டிகள் விறுவிறுப்பான கட்டத்தை எட்டியுள்ளன. இதில் இன்று நடைபெற்ற 31ஆவது லீக் போட்டியில் வங்கதேசம் மற்றும் பாகிஸ்தான் அணிகள் பலப்பரீட்சை நடத்தின. அதன்படி ஈடன் கார்டன்ஸ் மைதானத்தில் நடைபெற்ற இப்போட்டியில் டாஸ் வென்ற வங்கதேச அணி முதலில் பேட்டிங் செய்வதாக அறிவித்தது.
அதன்படி களமிறங்கிய வங்கதேச அணிக்கு தன்ஸித் ஹசன் - லிட்டன் தாஸ் இணை தொடக்கம் கொடுத்தனர். இதில் தன்ஸித் ஹசன் ரன்கள் ஏதுமின்றி ஆட்டமிழக்க, அடுத்து வந்த, நஜ்முல் ஹொசைன் சாண்டோ 4 ரன்களுக்கும் என அடுத்தடுத்து ஷாஹின் அஃப்ரிடி பந்துவீச்சில் ஆட்டமிழந்தனர். அடுத்து களமிறங்கிய முஷ்பிக்கூர் ரஹிமும் 5 ரன்களில் ஆட்டமிழந்தார்.
Trending
பின்னர் ஜோடி சேர்ந்த லிட்டன் தாஸ் - மஹ்முதுல்லா இணை பொறுப்பான ஆட்டத்தை வெளிப்படுத்தி விக்கெட் இழப்பை தடுத்ததுடன், அணியின் ஸ்கோரை உயர்த்தினர். இதில் அரைசதம் அடிப்பார் என எதிர்பார்க்கப்பட்ட லிட்டன் தாஸ் 45 ரன்களுக்கு ஆட்டமிழக்க, மறுபக்கம் அரைசதம் கடந்து மஹ்முதுல்லா 6 பவுண்டரி, ஒரு சிக்சர் என 56 ரன்கள் எடுத்த நிலையில் விக்கெட்டை இழந்தார்.
இதனையடுத்து இணைந்த கேப்டன் ஷாகிப் அல் ஹசன் - மெஹிதி ஹசன் மிராஸ் இணை ஓரளவு தாக்குபிடித்து ஸ்கோரை உயர்த்தினர். இதில் அதிரடியாக விளையாட முயன்ற ஷாகிப் அல் ஹசன் 43 ரன்களுக்கு ஆட்டமிழ, மெஹிதி ஹசனும் 25 ரன்களில் விக்கெட்டை இழந்தார். இதையடுத்து வந்த தஸ்கின் அகமதும் முகமது வாசிம் ஜூனியர் பந்துவீச்சில் ஆட்டமிழந்தார்.
இதனால் வங்கதேச அணி 45.1 ஓவர்களில் அனைத்து விக்கெட்டுகளையும் இழந்து 204 ரன்களுக்கு ஆல் அவுட்டானது. பாகிஸ்தான் அணி தரப்பில் சிறப்பாக பந்துவீசிய ஷாஹீன் அஃப்ரிடி, முகமது வாசீம் ஜூனியர் தலா 3 விக்கெட்டுகளையும், ஹாரிஸ் ராவுஃப் இரண்டு விக்கெட்டுகளையும் கைப்பற்றினர்.
Win Big, Make Your Cricket Tales Now
