அண்டர் 19 உலகக்கோப்பை: பாகிஸ்தான், வெஸ்ட் இண்டீஸ் அணிகள் வெற்றி!

அண்டர் 19 உலகக்கோப்பை: ஜிம்பாப்வேவுக்கு எதிரான போட்டியில் பாகிஸ்தானும், ஸ்காட்லாந்துக்கு எதிரான போட்டியில் வெஸ்ட் இண்டீஸும் வெற்றிபெற்றன.

அண்டர் 19 உலகக்கோப்பை தொடரில் நேற்று நடைபெற்ற போட்டியில் பாகிஸ்தான் - ஜிம்பாப்வே அணிகள் பலப்பரீட்சை நடத்தின.

இதில் முதலில் பேட்டிங் செய்த பாகிஸ்தான் அணி ஹசீபுல்லா கானின் அபார சதத்தின் காரணமாக 50 ஓவர்கள் முடிவில் 9 விக்கெட் இழப்பிற்கு 315 ரன்களைச் சேர்த்தது. 

இதில் அதிகபட்சமாக ஹசீபுல்லா கான் 135 ரன்களும், இர்ஃபான் கான் 75 ரன்களையும் சேர்த்தனர். ஜிம்பாப்வே அணி தரப்பில் அலெக்ஸ் ஃபாலோ 5 விக்கெட்டுகளைக் கைப்பற்றினார்.

இதையடுத்து கடின இலக்கை துரத்திய ஜிம்பாப்வே அணி 42.4 ஓவர்களிலேயே அனைத்து விக்கெட்டுகளையும் இழந்து 200 ரன்களை மட்டுமே எடுத்தது. இதன் மூலம் பாகிஸ்தான் அணி 115 ரன்கள் வித்தியாசத்தில் ஜிம்பாப்வே அணியை வீழ்த்தியது. 

அதேபோல் நேற்று நடைபெற்ற மற்றொரு ஆட்டத்தில் வெஸ்ட் இண்டீஸ் - ஸ்காட் லாந்து அணிகள் மோதின. இப்போட்டியில் முதலில் பேட்டிங் செய்த ஸ்காட்லாந்து அணி 35 ஓவர்களிலேயே அனைத்து விக்கெட்டுகளையும் இழந்து 95 ரன்களை மட்டுமே எடுத்தது.

எளிய இலக்கை துரத்திய வெஸ்ட் இண்டீஸ் அணியானது 19.4 ஓவர்களிலேயே இலக்கை எட்டி, 7 விக்கெட் வித்தியாசத்தில் ஸ்காட்லாந்து அணியை வீழ்த்தியது.