ஐபிஎல் 2022: ராஜஸ்தானை வீழ்த்தி முதல் வெற்றியைப் பெற்றது மும்பை இந்தியன்ஸ்!

ஐபிஎல் 2022: ராஜஸ்தான் ராயல்ஸுக்கு எதிரான லீக் ஆட்டத்தில் மும்பை இந்தியன்ஸ் அணி 5 விக்கெட் வித்தியாசத்தில் வெற்றிபெற்று, நடப்பு சீசனின் முதல் வெற்றியைப் பெற்றது.

ஐபிஎல் தொடரின் 44ஆவது லீக் ஆட்டத்தில் ராஜஸ்தான் ராயல்ஸ், மும்பை இந்தியன்ஸ் அணிகள் இன்று பலப்பரீட்சை நடத்துகின்றன. நவி மும்பையின் டிஒய் பாட்டீல் மைதானத்தில் நடைபெறும் இந்த ஆட்டத்தில் டாஸ் வென்ற மும்பை அணி அணி முதலில் பந்து வீச்சைத் தேர்வு செய்தது.

ராஜஸ்தாஸ் அணியின் தொடக்க ஆட்டக்காரர்களாக தேவ்தத் படிக்கல், பட்லர் ஆகியோர் களமிறங்கினர். படிக்கல் 15 ரன்களில் ஆட்டமிழக்க கேப்டன் சஞ்சு சாம்சன் களம்கண்டார். இருப்பினும் அந்த அணியில் பட்லரை தவிர யாருக்கும் நிலைத்து ஆடவில்லை. அபாரமாக விளையாடிய பட்லர் 52 பந்துகளில் 67 ரன்களுக்கு ஆட்டமிழந்தார்.

ராஜஸ்தான் அணி நிர்ணயிக்கப்பட்ட 20 ஓவர்களில் 6 விக்கெட்டுகள் இழப்புக்கு 158 ரன்கள் எடுத்தது.  மறைந்த முன்னாள் ஆஸி. கிரிக்கெட் வீரர் ஷேன் வார்னேவை கௌரவிக்கும் விதமாக ராஜஸ்தான் அணி 'SW23' என அச்சிடப்பட்ட சிறப்பு ஜெர்சி அணிந்து இன்று விளையாடுகிறது.

இதையடுத்து இலக்கை துரத்திய மும்பை இந்தியன்ஸ் அணியின் கேப்டன் ரோஹித் சர்மா 2 ரன்களில் ஆட்டமிழந்து ரசிகர்களை மிகப்பெரும் ஏமாற்றத்தில் ஆழ்த்தினார்.

அதன்பின் ஜோடி சேர்ந்த் இஷான் கிஷான் - சூர்யகுமார் யாதவ் இணை பொறுப்பான ஆட்டத்தை வெளிப்படுத்தி ஸ்கோரை உயர்த்தினர். பின் 26 ரன்கள் எடுத்திருந்த இஷான் கிஷான் விக்கெட்டை இழந்தார்.

அவரைத் தொடர்ந்து களமிறங்கிய திலக் வர்மாவும் சிறப்பான ஆட்டத்தை வெளிப்படுத்தி ஸ்கோரை உயர்த்தினார். இதற்கிடையில் மறுமுனையிலிருந்த சூர்யகுமார் யாதவ் தனது அரைசதத்தைப் பூர்த்தி செய்தார்.

அதன்பின் 51 ரன்களில் சூர்யகுமார் யாதவ் ஆட்டமிழக்க, அதற்கு அடுத்த ஓவரிலேயே திலக் வர்மா 35 ரன்களுக்கு விக்கெட்டை இழந்தார். இதனால் போட்டியின் வெற்றிக்கு யாருக்கு என்ற பரபரப்பு ஆட்டத்தில் தொற்றிக்கொண்டது.

அதனைத்தொடர்ந்து களமிறங்கிய டிம் டெவிட் அதிரடியாக விளையாடி அணியை வெற்றியைக் நோக்கி அழைத்துச் சென்றார்.

இதன்மூலம் மும்பை இந்தியன்ஸ் அணி 19.2 ஓவரில் இலக்கை எட்டி 5 விக்கெட் வித்தியாசத்தில் ராஜஸ்தான் ராயல்ஸ் அணியை வீழ்த்தி வெற்றிபெற்றது. மேலும் நடப்பாண்டு ஐபிஎல் தொடரில் மும்பை இந்தியன்ஸ் அணி பெறும் முதல் வெற்றியாகவும் இது அமைந்தது.