ஐபிஎல் 2024: குஜராத் டைட்டன்ஸை பந்தாடி டெல்லி கேப்பிட்டல்ஸ் அபார வெற்றி!

ஐபிஎல் 2024: குஜராத் டைட்டன்ஸ் அணிக்கு எதிரான லீக் போட்டியில் டெல்லி கேப்பிட்டல்ஸ் அணி 6 விக்கெட் வித்தியாசத்தில் அபார வெற்றியைப் பதிவுசெய்தது.

ஐபிஎல் 2024: குஜராத் டைட்டன்ஸை பந்தாடி டெல்லி கேப்பிட்டல்ஸ் அபார வெற்றி! (Image Source: Google)

ஐபிஎல் தொடரின் 17ஆவது சீசன் லீக் போட்டிகள் நாளுக்கு நாள் ரசிகர்களின் எதிர்பார்ப்புகளை அதிகரித்து வரும் நிலையில், இன்று நடைபெற்ற 32ஆவது லீக் போட்டியில் ஷுப்மன் கில் தலைமையிலான குஜராத் டைட்டன்ஸ் அணியை எதிர்த்து, ரிஷப் பந்த் தலைமையிலான டெல்லி கேப்பிட்டல்ஸ் அணி பலப்பரீட்சை நடத்தியன. அஹ்மதாபாத்தில் உள்ள நரேந்திர மோடி கிரிக்கெட் மைதானத்தில் நடைபெற்ற இப்போட்டியில் டாஸ் வென்ற டெல்லி கேப்பிட்டல்ஸ் அணி கேப்டன் ரிஷப் பந்து முதலில் பந்துவீசுவதாக அறிவித்து குஜராத் டைட்டன்ஸ் அணியை பேட்டிங் செய்ய அழைத்தார்.. 

இதையடுத்து இன்னிங்ஸைத் தொடங்கிய குஜராத் டைட்டன்ஸ் அணிக்கு ஷுப்மன் கில் - விருத்திமான் சஹா இணை தொடக்கம் கொடுத்தனர். இப்போட்டியில் அதிரடியாக தொடங்கிய ஷுப்மன் கில் 8 ரன்கள் எடுத்திருந்த நிலையில் இஷாந்த் சர்மா பந்துவீச்சில் பிரித்வி ஷாவிடம் கேட்ச் கொடுத்து ஆட்டமிழந்தார். அவரைத்தொடர்ந்து மற்றொரு தொடக்க வீரரான விருத்திமான் சஹாவும் 2 ரன்களை மட்டுமே எடுத்திருந்த நிலையில் ஆட்டமிழந்தார். பின்னர் ஜோடி சேர்ந்த் சாய் சுதர்ஷன் மற்றும் காயத்திலிருந்து மீண்டுள்ள டேவிட் மில்லர் இணை மீது பெரும் எதிர்பார்ப்புகள் இருந்தன. 

இப்போட்டியில் சரியாக பந்தை டைமிங் செய்துவந்த சாய் சுதர்ஷன் 12 ரன்கள் எடுத்திருந்த நிலையில் தேவையில்லாமல் சிங்கிள் எடுக்க முயற்சித்து ரன் அவுட் முறையில் தனது விக்கெட்டை இழந்தார். அதன்பின் அதோ ஓவரின் கடைசி பந்தில் 2 ரன்கள் மட்டுமே எடுத்திருந்த டேவிட் மில்லரும் இஷாந்த் சர்மா பந்துவீச்சில் ரிஷப் பந்திடம் கேட்ச் கொடுத்து பெவிலியனுக்கு நடையைக் கட்டினார். அதனைத்தொடர்ந்து களமிறங்கிய அபினவ் மனோகர் 8 ரன்களுக்கும், இம்பேக்ட் வீரராக களமிறங்கிய ஷாரூக் கான் ரன்கள் ஏதுமின்றியும் என அடுத்தடுத்து டிரிஸ்டன் ஸ்டப்ஸின் முதல் ஓவரிலேயே தங்களது விக்கெட்டுகளை இழந்து ஏமாற்றமளித்தனர்.

அதனைத்தொடர்ந்து அணியின் நம்பிக்கை நாயகன் ராகுல் திவேத்தியா பந்தை எதிர்கொள்ள தடுமாறிய நிலையில், மறுபக்கம் களமிறங்கிய ரஷித் கான் களமிறங்கியது முதலே அதிரடியாக விளையாடும் முனைப்போடு, பவுண்டரிகளை அடித்தார். ஆனால் அவருக்கு துணை நிற்க வேண்டிய ராகுல் திவேத்தியாவும் 10 ரன்களுக்கு ஆட்டமிழக்க, அடுத்து வந்த மோஹித் சர்மாவும் 2 ரன்களில் விக்கெட்டை இழந்தார். பின்னர் இப்போட்டியில் அணிக்கு இருந்த ஒரே நம்பிக்கை வீரருமான ரஷித் கான் 2 பவுண்டரி, ஒரு சிக்ஸர் என 31 ரன்கள் எடுத்த நிலையில் தனது விக்கெட்டை இழந்தார். 

அதன்பின் அதே ஓவரில் நூர் அஹ்மதும் ஒரு ரன்னில் க்ளீன் போல்டாகி பெவிலியனுக்கு திரும்பினார். இதனால் குஜராத் டைட்டன்ஸ் அணி 17.3 ஓவர்களில் அனைத்து விக்கெட்டுகளையும் இழந்ததுடன் 89 ரன்களை மட்டுமே எடுத்துள்ளது. டெல்லி கேப்பிட்டல்ஸ் அணி தரப்பில் சிறப்பாக பந்துவீசிய முகேஷ் குமார் 3 விக்கெட்டுகளையும், இஷாந்த் சர்மா, டிரிஸ்டன் ஸ்டப்ஸ் ஆகியோர் தலா 2 விக்கெட்டுகளையும் கைப்பற்றினர். இதையடுத்து 90 ரன்கள் எடுத்த வெற்றி என்ற எளிய இலக்கை நோக்கி களமிறங்கிய டெல்லி அணிக்கு பிரித்வி ஷா - ஜேக் ஃபிரெசர் மெக்குர்க் இணை தொடக்கம் கொடுத்தனர். 

இதில் மெக்குர்க் சந்தித்த முதல் பந்திலேயே சிக்ஸரை விளாசி இன்னிங்ஸைத் தொடங்கினார். அதன்பின் அதிரடியான ஆட்டத்தை வெளிப்படுத்திய மெக்குர்க் 2 பவுண்டரி, 2 சிக்ஸர்களுடன் 20 ரன்கள் எடுத்த நிலையில் விக்கெட்டை இழக்க, அவரைத்தொடர்ந்து 7 ரன்களுக்கு பிரித்வி ஷாவும், 2 பவுண்டரி, ஒரு சிக்ஸர் என 15 ரன்களைச் சேர்த்திருந்த அபிஷேக் போரால் ஆகியோரது விக்கெட்டுகளை அறிமுக வேகப்பந்துவீச்சாளர் சந்தீப் வாரியர் கைப்பற்றி அசத்தினார். அவர்களைத்தொடர்ந்து அதிரடியாக விளையாடி வந்த ஷாய் ஹோப் ஒரு பவுண்டரி, 2 சிக்ஸர்கள் என 19 ரன்கள் எடுத்த நிலையில் விக்கெட்டை இழந்தார்.

அதன்பின் களமிறங்கிய கேப்டன் ரிஷப் பந்த் ஒரு பவுண்டரி, ஒரு சிக்ஸருடன் 16 ரன்களையும் சுமித் குமார் இரண்டு பவுண்டரிகளுடன் 9 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் டெல்லி கேப்பிட்டல்ஸ் அணி 8.5 ஓவர்களில் இலக்கை எட்டியதுடன் 6 விக்கெட் வித்தியாசத்தில் அபார வெற்றியைப் பதிவுசெய்து அசத்தியுள்ளது. இந்த வெற்றியின் மூலம் டெல்லி கேப்பிட்டல்ஸ் அணி நடப்பு ஐபிஎல் சீசனில் தங்களது மூன்றாவது வெற்றியைப் பதிவுசெய்ததுடன், 6 புள்ளிகளைப் பெற்று 6ஆம் இடத்திற்கு முன்னேறி அசத்தியுள்ளது.

 

Win Big, Make Your Cricket Tales Now