லக்னோ சூப்பர் ஜெயண்ட்ஸ் vs குஜராத் டைட்டன்ஸ்: அணிகள் ஓர் அலசல்!

ஐபிஎல் தொடரில் இன்று நடைபெறும் லீக் போட்டியில் லக்னோ சூப்பர் ஜெயண்ட்ஸ் மற்றும் குஜராத் டைட்டன்ஸ் அணிகள் பலப்பரீட்சை நடத்தவுள்ளன.

லக்னோ சூப்பர் ஜெயண்ட்ஸ் vs குஜராத் டைட்டன்ஸ்: அணிகள் ஓர் அலசல்! (Image Source: Google)

ரசிகர்களின் பெரும் எதிர்பார்ப்புகளுக்கு மத்தியில் நடைபெற்று வரும் 18ஆவது சீசன் ஐபிஎல் தொடரில் இன்று நடைபெறும் 26ஆவது லீக் போட்டியில் ரிஷப் பந்த் தலைமையிலான லக்னோ சூப்பர் ஜெயண்ட்ஸ் மற்றும் ஷுப்மன் கில் தலைமையிலான குஜராத் டைட்டன்ஸ் அணிகள் பலப்பரீட்சை நடத்தவுள்ளன.

இவ்விரு அணிகளுக்கும் இடையேயான இப்போட்டியானது லக்னோவில் உள்ள ஏக்னா கிரிக்கெட் மைதானத்தில் நடைபெறவுள்ளது. இதில் இரு அணிகளும் அடுத்தடுத்து வெற்றிகளைப் பதிவுசெய்த கையோடு இப்போட்டியை எதிர்கொள்ளவுள்ளதன் காரணமாக, இதில் எந்த அணி வெற்றிபெறும் என்ற எதிர்பார்ப்புகள் ரசிகர்கள் மத்தியில் அதிகரித்துள்ளன. இந்நிலையில் இரு அணிகளில் பலம், அணிகளின் உத்தேச லெவன், நேருக்கு நேர் தரவுகள் மற்றும் ஃபேண்டஸி லெவன் குறித்து இந்த பதிவில் பார்ப்போம். 

லக்னோ சூப்பர் ஜெயண்ட்ஸ்

ரிஷப் பந்த் தலைமையிலான லக்னோ சூப்பர் ஜெயண்ட்ஸ் அணியானது நடப்பு ஐபிஎல் தொடரில் விளையாடிய 5 போட்டிகளில் 3 வெற்றி, 2 தோல்வியைச் சந்தித்த கையோடு, இப்போட்டியை எதிர்கொள்கிறது. இதனால் இந்த ஆட்டத்திலும் அந்த அணி வெற்றிபெறும் முனைப்பில் களமிறங்கவுள்ளது. அணியின் பேட்டிங்கைப் பொறுத்தமட்டில் மிட்செல் மார்ஷ், நிக்கோலஸ் பூரன், டேவிட் மில்லர் ஆகியோர் அபாரமான ஆட்டத்தை வெளிப்படுத்தி சிறப்பான ஃபர்மில் உள்ளனர்.

அவர்களுடன் ரிஷப் பந்த், ஐடன் மார்க்ரம், ஆயூஷ் பதோனி ஆகியோரும் சோபிக்கும் பட்சத்தில் அது அணிக்கு கைகொடுக்கும். அதேசமயம், பந்துவீச்சை பொறுத்தவரையில் மிகப்பெரும் பலவீனமாக உள்ளது. ஷர்துல் தாகூர், அவேஷ் கான், ரவி பிஷ்னாய் உள்ளிட்டோர் மட்டுமே அந்த அணியில் பந்துவீச்சை துறையை வழிநடத்துவதால் இப்போட்டியை அந்த அணி எவ்வாறு எதிர்கொள்ளும் என்ற எதிர்பார்ப்புகள் அதிகரித்துள்ளன. 

லக்னோ சூப்பர் ஜெயண்ட்ஸ் உத்தேச லெவன்: மிட்செல் மார்ஷ், ஐடன் மார்க்ரம், நிக்கோலஸ் பூரன், ரிஷப் பந்த் (கேப்டன் மற்றும் விக்கெட் கீப்பர்), ஆயுஷ் படோனி, டேவிட் மில்லர், அப்துல் சமத், ஷர்துல் தாக்கூர், ஆகாஷ் தீப், அவேஷ் கான், திக்வேஷ் சிங்.

குஜராத் டைட்டன்ஸ்

ஷுப்மன் கில் தலைமையிலான குஜராத் டைட்டன்ஸ் அணி நடப்பு ஐபிஎல் தொடரில் அடுத்தடுத்து வெற்றிகளைப் பதிவுசெய்து அசத்தியுள்ளது. அந்த அணியின் பேட்டிங்கைப் பொறுத்தவரையில் ஜோஸ் பட்லர், சாய் சுதர்ஷன், ஷெர்ஃபேன் ரூதர்ஃபோர்ட் உள்ளிட்டோர் பாரமான ஃபார்மில் உள்ளனர். அவர்களுடன், ஷாரூக் கான், ராகுல் திவேத்தியா, கிளென் பிலீப்ஸ், மஹிபால் லாம்ரோர் உள்ளிட்டோரும் இருப்பது அணிக்கு மிக்கப்பெரும் பலமாக பார்க்கப்படுகிறது. 

பந்துவீச்சைப் பொறுத்தவரையில் வேகப்பந்து வீச்சில் முகமது சிராஜ், காகியோ ரபாடா ஆகியோரும், சுழற்பந்துவீச்சில் ரஷித் கான், சாய் கிஷோர் ஆகியோரும் அபாரமான பந்துவீச்சை வெளிப்படுத்தி வருகிறனர். அவர்களுடன் பிரஷித் கிருஷ்ணா, அர்ஷத் கான் உள்ளிட்டோரும் சோபிக்கும் பட்சத்தில் எதிரணி பேட்டர்களுக்கு அது நிச்சயம் தலைவலியாக அமையும் என்பதில் சந்தேகமில்லை என்பது குறிப்பிடத்தக்கது. 

குஜராத் டைட்டன்ஸ் உத்தேச லெவன்: சாய் சுதர்ஷன், ஷுப்மான் கில் (கேப்டன்), ஜோஸ் பட்லர், ஷெர்பேன் ரூதர்ஃபோர்ட், ஷாருக் கான், ராகுல் திவேத்தியா, அர்ஷத் கான், ரஷித் கான், சாய் கிஷோர், முகமது சிராஜ், பிரசித் கிருஷ்ணா.

நேருக்கு நேர்

• மோதிய போட்டிகள் - 05
• குஜராத் டைட்டன்ஸ் – 04
• லக்னோ சூப்பர் ஜெயண்ட்ஸ் - 01

ஃபேண்டஸி லெவன் டிப்ஸ்

• விக்கெட் கீப்பர் - ஜோஸ் பட்லர், நிக்கோலஸ் பூரன் (கேப்டன்)
• பேட்ஸ்மேன்கள் - மிட்செல் மார்ஷ், டேவிட் மில்லர், ஷுப்மான் கில், ஷெர்பேன் ரூதர்ஃபோர்ட், சாய் சுதர்சன் (துணை கேப்டன்)
• ஆல்-ரவுண்டர் - ஐடன் மார்க்ராம்
• பந்துவீச்சாளர்கள் - ஷர்துல் தாக்கூர், முகமது சிராஜ், சாய் கிஷோர்.