WI vs IND, 5th T20I: இந்தியாவை வீழ்த்தி தொடரைக் கைப்பற்றியது வெஸ்ட் இண்டீஸ்!

இந்தியாவுக்கு எதிரான கடைசி டி20 போட்டியில் வெஸ்ட் இண்டீஸ் அணி 8 விக்கெட் வித்தியாசத்தில் வெற்றிபெற்றதுடன், 3-2 என்ற கணக்கில்

WI vs IND, 5th T20I: இந்தியாவை வீழ்த்தி தொடரைக் கைப்பற்றியது வெஸ்ட் இண்டீஸ்! (Image Source: Google)

இந்திய கிரிக்கெட் அணிக்கு எதிரான டி20 தொடரை 3-2 என்ற கணக்கில் வென்றுள்ளது வெஸ்ட் இண்டிஸ் அணி. தொடரின் வெற்றியாளரை தீர்மானிக்கும் 5-வது டி20 போட்டியில் 8 விக்கெட்கள் வித்தியாசத்தில் வெஸ்ட் இண்டிஸ் அணி வெற்றி பெற்றது. இந்திய கிரிக்கெட் அணி மேற்கு இந்தியத் தீவுகளில் சுற்றுப்பயணம் மேற்கொண்டு கிரிக்கெட் தொடரில் விளையாடியது. 

டெஸ்ட் மற்றும் ஒருநாள் தொடரை இந்தியா வென்றது. 5 போட்டிகள் கொண்ட டி20 தொடரின் முதல் 3 போட்டிகள் வெஸ்ட் இண்டிஸிலும், கடைசி 2 போட்டிகள் அமெரிக்காவின் புளோரிடாவிலும் நடைபெற்றது. இந்த தொடரின் முதல் 2 போட்டிகளில் மேற்கு இந்தியத் தீவுகள் அணி வெற்றி பெற்றது. அடுத்த 2 போட்டிகளை இந்திய அணி வென்றது. தொடரின் கடைசி போட்டியில் டாஸ் வென்ற இந்திய அணி பேட்டிங் தேர்வு செய்தது. 

முதலில் பேட் செய்த இந்திய அணி, 20 ஓவர்களில் 9 விக்கெட்கள் இழப்புக்கு 165 ரன்கள் எடுத்தது. அதிகபட்சமாக சூர்யகுமார் யாதவ் 45 பந்துகளில் 61 ரன்கள் எடுத்தார். திலக் வர்மா, 18 பந்துகளில் 27 ரன்கள் எடுத்தார். மற்ற அனைத்து பேட்ஸ்மேன்களும் சொற்ப ரன்களில் ஆட்டமிழந்தனர். 166 ரன்கள் எடுத்தால் வெற்றி என்ற இலக்கை வெஸ்ட் இண்டிஸ் அணி விரட்டியது. 

இதில் 10 ரன்களில் கைல் மேயர்ஸ் ஆட்டமிழந்தார். அதன் பின்னர் நிக்கோலஸ் பூரன் மற்றும் பிராண்டன் கிங் இணைந்து 107 ரன்களுக்கு பார்ட்னர்ஷிப் அமைத்தனர். பூரன், 35 பந்துகளில் 47 ரன்கள் எடுத்து திலக் வர்மா பந்துவீச்சில் ஆட்டமிழந்தார். இருப்பினும் இறுதி வரை ஆட்டமிழக்காமல் இருந்த கிங், 55 பந்துகளில் 85 ரன்கள் எடுத்திருந்தார்.

இதன்  மூலம் வெஸ்ட் இண்டீஸ் அணி 18 ஓவர்களில் இலக்கை எட்டியதுடன், 8 விக்கெட் வித்தியாசத்தில் இந்திய அணியை வீழ்த்தி வெற்றிபெற்றது. இதன்மூலம் வெஸ்ட் இண்டீஸ் அணி 3-2 என்ற கணக்கில் டி20 தொடரைக் கைப்பற்றியது. இத்தொடரில் சிறப்பாக செயல்பட்ட நிக்கோலஸ் பூரன் தொடர் நாயகன் விருதை வென்றார்.