டி20 உலகக்கோப்பை: மார்டின் கப்தில் விளையாடுவது சந்தேகம்

இந்தியாவுக்கு எதிரான ஆட்டத்தில் பிரபல நியூசிலாந்து வீரர் மார்டின் கப்தில் விளையாடுவது சந்தேகம் எனத் தெரிகிறது.

டி20 உலகக் கோப்பைப் போட்டியில் இந்தியாவும் நியூசிலாந்தும் தங்களுடைய முதல் ஆட்டத்தில் பாகிஸ்தானிடம் தோல்வியடைந்துள்ளன. இதனால் அக்டோபர் 31ஆம் தேதி இரு அணிகளுக்கிடையே நடைபெறும்  ஆட்டத்தில் இரு அணிகளும் வெல்லவேண்டிய கட்டாயத்தில் உள்ளன. 

இதில் தோல்வியடையும் அணியால் அவ்வளவு எளிதாக அரையிறுதிக்குத் தகுதி பெற முடியாது. இந்நிலையில் பாகிஸ்தானுக்கு எதிரான ஆட்டத்தில் நியூசிலாந்து வீரர் மார்டின் கப்தில் காயம் அடைந்தார். 

பாகிஸ்தான் வேகப்பந்து வீச்சாளர் ஹாரிஸ் ராஃப் வீசிய பந்து, கப்திலின் காலைப் பதம் பார்த்தது. இதனால் அவருக்குக் காயம் ஏற்பட்டது. இதையடுத்து அவர் சிகிச்சை மேற்கொண்டு வருகிறார். 

காயம் காரணமாக ஆட்டத்தின் முடிவில் அசெளகரியமாக உணர்ந்தார் கப்தில். மேலும் அவரது காயத்தின் நிலை அடுத்த இரு நாள்களில் தெரிய வரும் என்று நியூசிலாந்து பயிற்சியாளர் கேரி ஸ்டட் கூறினார். 

இந்தியாவுக்கு எதிரான ஆட்டத்தில் பிரபல நியூசிலாந்து வீரர் மார்டின் கப்தில் பங்குபெறுவது முக்கியமானதாகும். ஏற்கெனவே, வேகப்பந்து வீச்சாளர் ஃபெர்குசன் காயம் காரணமாக டி20 உலகக் கோப்பைப் போட்டியிலிருந்து விலகியுள்ளார். அடுத்ததாக கப்திலும் நியூசிலாந்து அணியில் இடம்பெறாவிட்டால் அது அந்த அணிக்கு மேலும் பின்னடைவை ஏற்படுத்தும்.