IRE vs NZ, 2nd ODI: அயர்லாந்தை வீழ்த்தி தொடரை வென்றது நியூசிலாந்து!

அயர்லாந்துக்கு எதிரான இரண்டாவது ஒருநாள் போட்டியில் நியூசிலாந்து அணி 3 விக்கெட் வித்தியாசத்தில் வெற்றிபெற்று, 2-0 என்ற கணக்கில் ஒருநாள் தொடரை வென்றது.

New Zealand Beat Ireland By 3 Wickets; Build Unassailable 2-0 Lead (Image Source: Google)

அயர்லாந்தில் சுற்றுப்பயணம் மேற்கொண்டுள்ள நியூசிலாந்து அணி மூன்று போட்டிகள் கொண்ட ஒருநாள் தொடரில் விளையாடி வருகிறது. இதில் முதல் ஒருநாள் போட்டியில் நியூசிலாந்து அணி வென்ற நிலையில், தொடரின் வெற்றியாளரைத் தீர்மானிக்கும் இரண்டாவது ஒருநாள் போட்டி இன்று டப்ளினில் தொடங்கியது.

இப்போட்டியில் டாஸ் வென்ற நியூசிலாந்து அணி முதலில் பந்துவீச முடிவுசெய்து அயர்லாந்தை பேட்டிங் செய்ய அழைத்தது. அதன்படி களமிறங்கிய அயர்லாந்து அணிக்கு ஆரம்பமே அதிர்ச்சி காத்திருந்தது.

நட்சத்திர வீரர்கள் பால் ஸ்டிர்லிங் ரன் ஏதுமின்றியும், கேப்டன் பால்பிர்னி 2 ரன்களிலும், கடந்த போட்டியில் சதம் விளாசிய ஹேரி டெக்டர் 4 ரன்களிலும் அடுத்தடுத்து விக்கெட்டுகளை இழந்து ஏமாற்றமளித்தனர். இதையடுத்து ஆண்டி மெக்பிரைன் 28, காம்பெர் 25, லோர்கன் டக்கர் 19, சிமி சிங் 16 என அடுத்து வந்த வர்களும் விக்கெட்டுகளை இழந்து பெவிலியனுக்கு நடையைக் கட்டினர். 

இருப்பினும் ஏழாவது விக்கெட்டுக்கு களமிறங்கிய ஜார்ஜ் டக்ரெல் சிறப்பான ஆட்டத்தை வெளிப்படுத்தி அரைசதம் கடந்ததுடன், அணியை 200 ரன்களை கடக்கவும் உதவினார். இறுதியில் 74 ரன்களைச் சேர்த்திருந்த டக்ரெலும் விக்கெட்டை இழந்தார்.

இதனால் 48 ஓவர்களில் அயர்லாந்து அணி அனைத்து விக்கெட்டுகளையும் இழந்து 216 ரன்களை மட்டுமே எடுத்தது. நியூசிலாந்து தரப்பில் மேட் ஹென்றி, மிட்செல் சாண்ட்னர், மைக்கேல் பிரேஸ்வெல் ஆகியோர் தலா 2 விக்கெட்டுகளைக் கைப்பற்றினர்.

இதையடுத்து இலக்கை துரத்திய நியூசிலாந்து அணியின் மார்ட்டின் கப்தில், வில் யங் ஆகியோர் மார்க் அதிர் வீசிய முதல் ஓவரில் முதல் இரண்டு பந்துகளில் க்ளீன் போல்டாகி ஏமாற்றமளித்தனர். 

இதையடுத்து ஜோடி சேர்ந்த ஃபின் ஆலன் - கேப்டன் டாம் லேதம் இணை சிறப்பான ஆட்டத்தை வெளிப்படுத்தி அரைசதம் கடந்தனர். பின் 60 ரன்களில் ஃபின் ஆலனும், 55 ரன்காளில் டாம் லேதமும் விக்கெட்டை இழந்தனர். 

அதன்பின் கிளென் பிலீப்ஸ், ஹென்றி நிக்கோலஸ் ஆகியோரும் சொற்ப ரன்களுக்கு விக்கெட்டை இழந்தனர். பின்னர் களமிறங்கிய மைக்கேல் பிரேஸ்வெல் இறுதிவரை ஆட்டமிழக்காமல் அணியை வெற்றிக்கு அழைத்துச் சென்றார்.

இதன்மூலம் நியூசிலாந்து அணி 38.1 ஓவர்களில் இலக்கை எட்டி 3 விக்கெட் வித்தியாசத்தில் அயர்லாந்தை வீழ்த்தியது. மேலும் 2-0 என்ற கணக்கில் ஒருநாள் தொடரை நியூசிலாந்து அணி வெற்றிபெற்றது.