பிபிஎல் 2021: பெர்த் ஸ்காச்சர்ஸ் அணியில் மீண்டும் இணைந்த காலின் முன்ரோ!

பிபிஎல் 11ஆவது சீசனுக்கான பெர்த் ஸ்காச்சர்ஸ் அணியில் நியூசிலாந்தின் காலின் முன்ரோ மீண்டும் ஒப்பந்தமாகியுள்ளார்.

நியூசிலாந்து அணியின் அதிரடி தொடக்க வீரர் காலின் முன்ரோ. இவர் நடப்பு சீசன் கரீபியன் பிரீமியர் லீக் தொடரில் டிரின்பாகோ நைட் ரைடர்ஸ் அணிக்காக விளையாடிவந்தார்.

இந்நிலையில், வருகிற டிசம்பர் மாதம் ஆஸ்திரேலியாவின் உள்ளூர் டி20 கிரிக்கெட் தொடரான பிக் பேஷ் லீக் டி20 தொடரின் 11ஆவது சீசன் தொடங்கவுள்ளது. இதையடுத்து இத்தொடருக்கான அனைத்து அணிகளும் தீவிரமாக தயாராகி வருகின்றன.

இதன் ஒரு பகுதியாக பிபிஎல் அணிகளில் ஒன்றான பெர்த் ஸ்காச்சர்ஸ் அணியில் காலின் முன்ரோ மீண்டும் இணைந்துள்ளார். 

இதுகுறித்து பேசிய காலின் முன்ரோ, “மீண்டும் பெர்த் ஸ்காச்சர்ஸ் அணிக்கு திரும்புவதில் மகிழ்ச்சியடைகிறேன். கடந்த சீசனில் அந்த அணிக்கு விளையாடியதை மிகவும் விரும்பினேன். அதிலும் கடந்த சீசனில் விளையாடியவர்களுடன் விளையாட மிகவும் ஆர்வமாக உள்ளேன்” என்று தெரிவித்துள்ளார்.