NZ vs PAK, 3rd T20I: சதமடித்து மிரட்டிய ஹசன் நவாஸ்; நியூசிலாந்தை வீழ்த்தி பாகிஸ்தான் அபார வெற்றி!

நியூசிலாந்து அணிக்கு எதிரான மூன்றாவது டி20 போட்டியில் பாகிஸ்தான் அணி 9 விக்கெட் வித்தியாசத்தில் த்ரில் வெற்றியைப் பதிவுசெய்து அசத்தியுள்ளது.

NZ vs PAK, 3rd T20I: சதமடித்து மிரட்டிய ஹசன் நவாஸ்; நியூசிலாந்தை வீழ்த்தி பாகிஸ்தான் அபார வெற்றி! (Image Source: Google)

நியூசிலாந்தில் சுற்றுப்பயணம் மேற்கொண்டுள்ள பாகிஸ்தான் அணியானது 5 போட்டிகள் கொண்ட டி20 தொடரிலும், மூன்று போட்டிகளைக் கொண்ட ஒருநாள் தொடரிலும் விளையாடி வருகிறது. இதில் நடந்து முடிந்த முதலிரண்டு டி20 போட்டியிலும் நியூசிலாந்து அணி வெற்றியைப் பதிவுசெய்து 2-0 என்ற கணக்கில் முன்னிலைப் பெற்றுள்ளது.

இதையடுத்து இரு அணிகளுக்கும் இடையேயான மூன்றாவது டி20 போட்டி இன்று நடைபெற்ற்து. ஆக்லாந்தில் உள்ள ஈடன் பார்க் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற பாகிஸ்தான் அணி முதலில் பந்துவீசுவதாக அறிவித்துள்ளது. இதையடுத்து பேட்டிங் செய்ய களமிறங்கிய நியூசிலாந்து அணிக்கு டிம் செய்ஃபெர்ட் - ஃபின் ஆலன் இணை தொடக்கம் கொடுத்தனர். இதில் ஃபின் ஆலன் ரன்கள் ஏதுமின்றி விக்கெட்டை இழக்க, அதிரடியாக தொடங்கிய டிம் செஃபெர்டும் ஒரு பவுண்டரி, 2 சிக்ஸர்கள் என 19 ரன்களில் விக்கெட்டை இழந்தார்.

அதன்பின் களமிறங்கிய மார்க் சாப்மேன் அதிரடியான ஆட்டத்தை வெளிப்படுத்தி ஸ்கோரை உயர்த்தினார். அதேசமயம் அவருடன் இணைந்து விளையாடிய டேரில் மிட்செல் ஒரு பவுண்டரி, ஒரு சிக்ஸர் என 17 ரன்னிலும், ஜேம்ஸ் நீஷம் 3 ரன்னிலும், மிட்செல் ஹெய் 9 ரன்னிலும் என ஆட்டமிழந்தனர். இதற்கிடையில் அரைசதம் கடந்து விளையாடி வந்த மார்க் சாப்மேன் சதமடிப்பார் என்று எதிர்பார்க்கப்பட்ட நிலையில் 11 பவுண்டரி, 4 சிக்ஸர்கள் என 94 ரன்களைச் சேர்த்திருந்த நிலைய்ல் விக்கெட்டை இழந்து சதமடிக்கும் வாய்ப்பை தவறவிட்டார். அதன்பின் களமிறங்கிய கைல் ஜேமிசன், மிட்செல் ஹெய் ஆகியோரும் சொற்ப ரன்களுக்கு விக்கெட்டை இழந்தார். 

இறுதியில் அதிரடியான ஆட்டத்தை வெளிப்படுத்திய கேப்டன் மைக்கேல் பிரேஸ்வெல் 3 பவுண்டரி, 2 சிக்ஸர்கள் என 31 ரன்களைச் சேர்த்த கையோடு தனது விக்கெட்டை இழந்தார். அதன்பின் களமிறங்கிய வீரர்களும் சோபிக்க தவற, நியூசிலாந்து அணி 19.5 ஓவர்களிலேயே அனைத்து விக்கெட்டுகளையும் இழந்து 204 ரன்களில் ஆல் அவுட்டானது. பாகிஸ்தான் அணி தரப்பில் சிறப்பான பந்துவீச்சை வெளிப்படுத்திய ஹாரிஸ் ராவுஃப் 3 விக்கெட்டுகளையும், ஷாஹீன் அஃப்ரிடி, அப்பாஸ் அஃப்ரிடி மற்றும் அப்ரார் அஹ்மத் ஆகியோர் தலா 2 விக்கெட்டுகளையும் கைப்பற்றினர். 

இதனைத்தொடர்ந்து இமாலய இலக்கை நோக்கி களமிறங்கிய பாகிஸ்தான் அணிக்கு முகமது ஹாரிஸ் மற்றும் ஹசன் நவாஸ் இணை தொடக்கம் கொடுத்தனர். இருவரும் ஆரம்பம் முதலே பவுண்டரிகளையும் சிக்ஸர்களையும் பறக்கவிட்டு அசத்த, அணியின் ஸ்கோரும் மளமளவென உயர்ந்தது. இதில் தொடர்ந்து அபாரமாக விளையாடி வந்த இருர்வரும் இணைந்து முதல் விக்கெட்டிற்கு 74 ரன்கள் பார்ட்னர்ஷிப் அமைத்து அணியின் வெற்றிக்கு தேவையான அடித்தளத்தை அமைத்துக் கொடுத்தனர். அதன்பின் 4 பவுண்டரி, 3 சிக்ஸர்கள் என 41 ரன்களைச் சேர்த்திருந்த ஹாரிஸ் தனது விக்கெட்டை இழந்தார். 

பின்னர் ஹசன் நவாஸுடன் இணைந்த கேப்டன் சல்மான் அலி ஆகாவும் அதிரடியாக விளையாடி ஸ்கோரின் வேகத்தை உயர்த்தினார். இப்போட்டியில் அபாரமாக விளையாடிய ஹசன் நவாஸ் 44 பந்துகளில் தனது முதல் சர்வதேச டி20 சதத்தைப் பூர்த்தி செய்து அசத்தியதுடன், இறுதிவரை ஆட்டமிழக்காமல் 10 பவுண்டரி, 7 சிக்ஸர்கள் என 105 ரன்களைச் சேர்த்தார். அதேசமயம் அவருடன் இணைந்து அதிரடியான ஆட்டத்தை வெளிப்படுத்திய கேப்டன் சல்மான் அலி ஆகாவும் அரைசதம் கடந்ததுடன், 6 பவுண்டரிகள், 2 சிக்ஸர்கள் என 51 ரன்களையும் சேர்த்து அணிக்கு வெற்றியைத் தேடிக்கொடுத்தனர். 

இதன்மூலம் பாகிஸ்தான் அணியானது 16 ஓவர்களிலேயே 205 ரன்கள் என்ற இலக்கை எட்டியதுடன் 9 விக்கெட் வித்தியாசத்தில் நியூசிலாந்தை வீழ்த்தி அபார வெற்றியைப் பதிவுசெய்து அசத்தியது. இந்த வெற்றியின் மூலம் பாகிஸ்தான் அணி 5 போட்டிகள் கொண்ட டி20 தொடரில் 1-2 என்ற கணக்கில் தொடரில் நீடித்து வருகிறது. மேற்கொண்டு இப்போட்டியில் சதமடித்து அசத்திய ஹசன் நவாஸ் ஆட்டநாயகன் விருதை வென்றார். 

Win Big, Make Your Cricket Tales Now