PAK vs WI: கரோனா அச்சுறுத்தல் காரணமாக ஒருநாள் தொடர் ஒத்திவைப்பு!

கரோனா பரவல் அச்சுறுத்தல் காரணமாக பாகிஸ்தான் - வெஸ்ட் இண்டீஸ் அணிகளுக்கு இடையேயான ஒருநாள் தொடர் அடுத்தாண்டு ஜூன் மாதத்திற்கு ஒத்திவைக்கப்பட்டுள்ளது.

வெஸ்ட் இண்டீஸ் அணி, பாகிஸ்தானுக்குச் சுற்றுப்பயணம் செய்து 3 டி20, 3 ஒருநாள் ஆட்டங்களில் விளையாடுகிறது. அனைத்து ஆட்டங்களும் கராச்சியில் நடைபெறுகின்றன. முதல் இரு டி20 ஆட்டங்களை வென்று டி20 தொடரைக் கைப்பற்றியுள்ளது பாகிஸ்தான் அணி. 

இந்நிலையில் இரு அணிகளுக்கும் இடையேயான 3ஆவது டி20 போட்டி இன்று நடைபெற்று வருகிறது. இப்போட்டியிலாவது வெஸ்ட் இண்டீஸ் அணி பாகிஸ்தானை வீழ்த்தி ஆறுதல் வெற்றியைப் பதிவுசெய்யும் என எதிர்பார்க்கப்படுகிறது.

இந்நிலையில் தொடர் தொடங்குவதற்கு முன்னதாகவே வெஸ்ட் இண்டீஸ் அணியைச் சேர்ந்த ஷெல்டன் காட்ரெல், ராஸ்டன் சேஸ், கைல் மையர்ஸ் ஆகிய 3 வீரர்கள் கரோனாவால் பாதிக்கப்பட்டுள்ள நிலையில், இன்று மேலும் 3 வீரர்கள் உள்பட 5 பேர் கரோனாவால் பாதிக்கப்பட்டதாக அறிவிப்பு வெளியானது. 

அதன்படி ஷாய் ஹோப், அகேல் ஹுசைன், ஜஸ்டின் கிரீவ்ஸ் ஆகிய மூன்று வெஸ்ட் இண்டீஸ் வீரர்களும் கரோனாவால் பாதிக்கப்பட்டுள்ளதால் தனிமைப்படுத்தப்பட்டனர். மேலும் அவர்களால் இந்தச் சுற்றுப்பயணத்தின் மீதமுள்ள போட்டிகளில் விளையாட முடியாது. 

இந்நிலையில் பாதிப்பு எண்ணிக்கை அதிகரித்து வருவதன் காரணமாக இரு அணிகளுக்கு இடையேயான மூன்று போட்டிகள் கொண்ட ஒருநாளை தொடரை ஒத்திவைப்பதாக பாகிஸ்தான் கிரிக்கெட் வாரியம் அறிவித்துள்ளது. 

மேலும் இத்தொடர் உலகக்கோப்பை சூப்பர் லீக்கில் கணக்கில் கொள்ளப்படும் என்பதால், அடுத்தாண்டு ஜூன் முதல் வாரத்தில் இத்தொடர் மீண்டும் நடைபெறும் என்றும் பாகிஸ்தான் கிரிக்கெட் வாரியம் அறிவித்துள்ளது. 

Win Big, Make Your Cricket Tales Now