பிஎஸ்எல் 2022: முன்ரோ; சதாப் கான் அசத்தல்; இஸ்லாமாபாத் அபார வெற்றி!

குயிட்டா கிளாடியேட்டர்ஸுக்கு எதிரான போட்டியில் இஸ்லாமாபாத் யுனைடெட் அணி 43 ரன்கள் வித்தியாசத்தில் அபார வெற்றிபெற்றது.

பாகிஸ்தான் சூப்பர் லீக் டி20 தொடரில் நேற்று நடைபெற்ற 10 ஆவது லீக் ஆட்டத்தில் இஸ்லாமாபாத் யுனைடெட் - குயிட்டா கிளாடியேட்டர்ஸ் அணிகள் பலப்பரீட்சை நடத்தின.

இப்போட்டியில் முதலில் பேட்டிங் செய்த இஸ்லாமாபாத் அணி காலின் முன்ரோ, ஆசாம் கான் ஆகியோரது அதிரடியான ஆட்டத்தால் 4 விக்கெட் இழப்பிற்கு 229 ரன்களைக் குவித்தது.

இதில் அதிகபட்சமாக காலின் முன்ரோ 72 ரன்களையும், ஆசாம் கான் 65 ரன்களையும், பால் ஸ்டிர்லிங் 58 ரன்களையும் சேர்த்தனர்.

அதன்பின்னர் இமாலய இலக்கை துரத்திய குயிட்டா கிளாடியேட்டர்ஸ் அஹ்சன் அலி அதிரடியான தொடக்கத்தைக் கொடுத்தார். இப்போட்டியில் அரைசதம் கடந்த அஹ்சன் அலி 50 ரன்களோடு வெளியேறினார். 

பின்னர் வந்த முகமது நவாஸ், ஜேம்ஸ் ஃபால்க்னர் இறுதியில் போராடிய நிலையிலும் அந்த அணியால் இலக்கை நெருங்க முடியவில்லை.

இதனால் 19.4 ஓவர்களிலேயே குயிட்டா கிளாடியேட்டர்ஸ் அணி அனைத்து விக்கெட்டுகளையும் இழந்து 186 ரன்களை மட்டுமே எடுத்தது. இஸ்லாமாபாத் அணி தரப்பில் கேப்டன் சதாப் கான் 5 விக்கெட்டுகளைக் கைப்பற்றினார். 

இதன்மூலம் இஸ்லாமாபாத் யுனைடெ அணி 43 ரன்கள் வித்தியாசத்தில் குயிட்டா கிளாடியேட்டர்ஸை வீழ்த்தி அபார வெற்றிபெற்றது.