பிஎஸ்எல் 2021: தொடரிலிருந்து விலகிய ஃபாஃப் டூ பிளெஸிஸ்!

பிஎஸ்எல் தொடரின் எஞ்சியுள்ள போட்டிகளிலிருந்து குயிட்டா கிளாடியேட்டர்ஸ் அணியின் நட்சத்திர வீரர் ஃபாஃப் டூ பிளெஸிஸ் விலகுவதாக அறிவித்துள்ளார்.

கரோனா அச்சுறுத்தல் காரணமாக ஒத்திவைக்கப்பட்டிருந்த பாகிஸ்தான் சூப்பர் லீக் டி20 தொடரின் எஞ்சியுள்ள போட்டிகள், கடந்த ஜூன் 9ஆம் தேதி முதல் அபுதாபியில் நடைபெற்று வருகிறது. 

இத்தொடரின் 19ஆவது லீக் ஆட்டத்தில் பெஸ்வர் ஸால்மி - குயிட்டா கிளாடியேட்டர்ஸ் அணிகள் மோதின. இப்போட்டியின் போது குயிட்டா கிளாடியேட்டர்ஸ் அணியில் இடம்பெற்றிருந்த தென் ஆப்பிரிக்க வீரர் ஃபாஃப் டூ பிளெஸிஸ் சக அணி வீரர் மீது மோதி காயமடைந்தார். 

இதையடுத்து அவர் உடனடியாக மருத்துமனைக்கு கொண்டு செல்லப்பட்டு சிகிச்சைக்கு அனுமதிக்கப்பட்டார். தற்போது அவர் சிகிச்சை முடிந்து விடுதியில் ஓய்வெடுத்து வருகிறார். மேலும் தனது உடல்நிலை குறித்து அவரே தனது ட்விட்டர் பக்கத்திலும் அறிவிப்பை வெளியிட்டிருந்தார். 

இந்நிலையில் ஃபாஃப் டூ பிளெஸிஸ் எஞ்சியுள்ள பிஎஸ்எல் போட்டிகளிலிருந்து விலகியுள்ளதாக குயிட்டா கிளாடியேட்டர்ஸ் அணி இன்று அறிவித்துள்ளது. 

இதுகுறித்து அந்த அணி வெளியிட்டுள்ள ட்விட்டர் பதிவில், “கிளாடியேட்டர் ஃபாஃப் டூ பிளெஸிஸ் போட்டியின் போது ஏற்பட்ட காயம் காரணமாக எஞ்சியுள்ள பிஎஸ்எல் போட்டிகளில் விளையாட மாட்டார் என்பதை தெரிவிக்கிறோம். மேலும் அவர் கூடிய விரைவில் தென் ஆப்பிரிக்க செல்லவுள்ளார். அவர் மீண்டும் களத்திற்கு திரும்ப நாங்கள் வாழ்த்துகிறோம்” என்று பதிவிட்டுள்ளது. 

Win Big, Make Your Cricket Tales Now