PSL 2023: ரைலீ ரூஸோவ் காட்டடி; முல்தான் சுல்தான்ஸ் அபார வெற்றி!
குயிட்டா கிளாடியேட்டர்ஸுக்கு எதிரான பிஎஸ்எல் லீக் ஆட்டத்தில் முல்தான் சுல்தான்ஸ் அணி 9 விக்கெட்டுகள் வித்தியாசத்தில் வெற்றிபெற்று அசத்தியது.
பாகிஸ்தன் சூப்பர் லீக் டி20 கிரிக்கெட் தொடரின் 8ஆவது சீசன் தற்போது தொடங்கி ரசிகர்களின் வரவேற்பை பெற்றுள்ளது. இதில் இன்று நடைபெற்று வரும் 3ஆவது லீக் ஆட்டத்தில் முல்தான் சுல்தான்ஸ் - குயிட்டா கிளாடியேட்டர்ஸ் அணிகள் பலப்பரீட்சை நடத்தி வருகின்றனர். இதில் டாஸ் வென்ற முல்தான் அணி முதலில் பந்துவீசுவதாக தீர்மானித்தது.
அதன்படி கிளாடியேட்டர்ஸ் அணிக்கு மார்ட்டின் கப்தில் - ஜேசன் ராய் ஆகியோர் தொடக்க வீரர்களாக களமிறங்கினர். இதில் மார்ட்டின் கப்தில் 7 ரன்களில் ஆட்டமிழக்க, அடுத்து வந்த அப்துல் ஒரு ரன்னிலும், கேப்டன் சர்ஃப்ராஸ் அஹ்மத் 2 ரன்களிலும் அடுத்தடுத்து விக்கெட்டுகளை இழந்து பெவிலியனுக்கு நடையைக் கட்டினர்.
Trending
மறுமுனையில் அதிரடியாக விளையாடி வந்த ஜேசன் ராயும் 27 ரன்களை எடுத்த நிலையில் ஆட்டமிழக்க, அடுத்து வந்த உமர் அக்மல், இஃப்திகார் அஹ்மத், முகமது நவாஸ், நசீம் ஷா ஆகியோரும் வந்த வேகத்திலேயே விக்கெட்டுகளை இழந்து பெவிலியனுக்கு நடையைக் கட்டினர். அதன்பின் வந்த முகமது ஹஸ்னைன் தனது பங்கிற்கு 22 ரன்களைச் சேர்த்தார்.
இறுதியில் முகமது ஹபீஸும் 18 ரன்களில் ஆட்டமிழக்க, குயிட்டா கிளாடியேட்டர்ஸ் அணி 18.5 ஓவர்களில் அனைத்து விக்கெட்டுகளையும் இழந்து 110 ரன்களுக்கு ஆல் அவுட்டானது. முல்தான் அணி தரப்பில் அபாரமாக பந்துவீசிய இஷானுல்லா 5 விக்கெட்டுகளையும், சமீன் குல், அபாஸ் அஃப்ரிடி தலா 2 விக்கெட்டுகளையும் கைப்பற்றினர்.
இதையடுத்து இலக்கை நோக்கி களமிறங்கிய முல்தான் சுல்தான்ஸ் அணியில் ஷான் மசூத் 3 ரன்களில் விக்கெட்டை இழந்து ஏமாற்றமளித்தார். பின்னர் ஜோடி சேர்ந்த கேப்டன் முகமது ரிஸ்வான் - ரைலீ ரூஸோவ் ஆகியோர் சிறப்பான ஆட்டத்தை வெளிப்படுத்தி அணியின் ஸ்கோரை மளமளவென் உயர்த்தினர். இதில் ரைலீ ரூஸோவ் அரைசதம் கடந்தார்.
இதில் இறுதிவரை ஆட்டமிழக்காமல் இருந்த ரூஸோவ் 42 பந்துகளில் 9 பவுண்டரி, 3 சிக்சர்கள் என 78 ரன்களைச் சேர்த்து அணியின் வெற்றிக்கு உதவினார். இதன்மூலம் முல்தான் சுல்தான் அணி 13.3 ஓவர்களில் இலக்கை எட்டி 9 விக்கெட் வித்தியாசத்தில் குயிட்டா கிளாடியேட்டர்ஸ் அணியை வீழ்த்தி அபார வெற்றியைப் பதிவுசெய்தது.
Win Big, Make Your Cricket Tales Now
