சிபிஎல் 2021: இறுதிப்போட்டிக்கு முன்னேறுவது யார்? செயிண்ட் லூசியா கிங்ஸ் vs டிரின்பாகோ நைட்ரைடர்ஸ்

சிபிஎல் டி20 தொடரில் இன்று நடைபெறும் முதல் அரையிறுதிப்போட்டியில் செயிண்ட் லூசியா கிங்ஸ் அணி, டிரின்பாகோ நைட் ரைடர்ஸ் அணியை எதிர்கொள்கிறது.

விறுவிறுப்பாக நடைபெற்றுவந்த கரீபியன் பிரீமியர் லீக் தொடர் தற்போது இறுதிக்கட்டத்தை எட்டியுள்ளது. இதில் டிரின்பாகோ நைட் ரைடர்ஸ், கயானா அமேசன் வாரியர்ஸ், செயிண்ட் கிட்ஸ் அண்ட் நேவிஸ் பேட்ரியாட்ஸ், செயிண்ட் லூசியா கிங்ஸ் ஆகிய அணிகள் அரையிறுதிச்சுற்றுக்கு முன்னேறியுள்ளன. 

இதில் இன்று நடைபெறும் முதல் அரையிறுதிப் போட்டியில் டிரின்பாகோ நைட்ரைடஸ் - செயிண்ட் லூசியா கிங்ஸ் அணிகள் மோதவுள்ளன. கடந்தாண்டு சிபிஎல் தொடரில் இந்த இரு அணிகளும் இறுதிப்போட்டியில் மோதியது.

அதில் டிரின்பாகோ நைட் ரைடர்ஸ் அணி வெற்றிபெற்று கோப்பையைக் கைப்பற்றியது. இதனால் இப்போட்டியில் செயிண்ட் லூசியா கிங்ஸ் அணி வெற்றிபெற்று தோல்விக்கு பழித்தீர்க்கும் என எதிர்பார்க்கப்படுகிறது. 

மேலும் நடப்பு சீசனில் இரு அணிகளும் மோதிய 2 போட்டிகளில் தலா ஒரு வெற்றியைப் பெற்று சமபலத்துடனே உள்ளன. சிபிஎல் தொடரில் இதுவரை இரு அணிகளும் மோதிய 15 போட்டிகளில் டிரின்பாகோ நைட்ரைடர்ஸ் 12 முறையும், செயிண்ட் லூசியா கிங்ஸ் 3 முறையும் வெற்றிபெற்றுள்ளன.

அதேசமயம் இரு அணிகளிலும் அதிரடியான வீரர்களும், திறமையான பந்துவீச்சாளர்களும் இடம்பிடித்துள்ளதால், இப்போட்டியில் யார் வெற்றிபெறுவார் என்ற எதிர்பார்ப்பு அதிகரித்துள்ளது. 

உத்தேச அணி

செயிண்ட் லூசியா கிங்ஸ்: ரகீம் கார்ன்வால், ஆண்ட்ரே ஃபிளட்சர், ஃபாஃப் டு பிளெசிஸ் (கே), ரோஸ்டன் சேஸ், மார்க் டீயல், டிம் டேவிட், டேவிட் வீஸ், ஜீவர் ராயல், கேஸ்ரிக் வில்லியம்ஸ், வஹாப் ரியாஸ், அல்ஜாரி ஜோசப்.

டிரின்பாகோ நைட் ரைடர்ஸ்: லெண்ட்ல் சிம்மன்ஸ், தினேஷ் ராம்டின், காலின் முன்ரோ, டேரன் பிராவோ, டிம் செய்ஃபெர்ட், கீரன் பொல்லார்ட் (கே), இசுரு உதானா, அகில் ஹொசைன், ஜெய்டன் சீல்ஸ், அலிகான், ரவி ராம்பால்.