WC Qualifier: வங்கதேசம், ஸ்காட்லாந்து அணிகள் வெற்றி!

பாகிஸ்தானில் நடைபெற்று வரும் மகளிர் உலகக்கோப்பை தகுதிச்சுற்று போட்டிகளில் வங்கதேசம் மற்றும் ஸ்காட்லாந்து அணிகள் வெற்றியைப் பதிவுசெய்துள்ளனர்.

WC Qualifier: வங்கதேசம், ஸ்காட்லாந்து அணிகள் வெற்றி! (Image Source: Google)

மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற 7ஆவது லீக் போட்டியில்  வங்கதேசம் மற்றும் அயர்லாந்து மகளிர் அணிகள் பலப்பரீட்சை நடத்தின. இப்போட்டியில் டாஸ் வென்ற அயர்லாந்து அணி பேட்டிங்கைத் தேர்வு செய்தது. 

அதன்படி களமிறங்கிய அயர்லாந்து அணிக்கு சாரா ஃபோர்ப்ஸ் - கேப்டன் கேபி லூயிஸ் இணை தொடக்கம் கொடுத்தனர். இதில் சாரா ஃபோர்ப்ஸ் 4 ரன்களில் ஆட்டமிழக்க, அவரைத்தொடர்ந்து கேபி லூயிஸும் 24 ரன்களில் விக்கெட்டை இழந்தார். பின்னர் இணைந்த ஏமி ஹண்டர் - ஓர்லா பிரெண்டர்காஸ்ட் இணை பொறுப்புடன் விளையாடி அணியின் ஸ்கோரை உயர்த்தினார். அதன்பின் 33 ரன்களைச் சேர்த்த கையோடு ஏமி ஹண்டர் 33 ரன்களில் ஆட்டமிழக்க, மறுபக்கம் அரைசதம் அடிப்பார் என எதிர்பார்க்கப்பட்ட பிரெண்டர்காஸ்டும் 41 ரன்களுடன் நடையைக் கட்டினார். 

பின்னர் லாரா டெலானி ஒருபக்கம் அபாரமாக விளையாடி ஸ்கோரை உயர்த்தியதுடன் தனது அரைசதத்தையும் பூர்த்தி செய்து அசத்தினார். பின் 63 ரன்களுடன் லாரா டெலானியும் விக்கெட்டை இழக்க, அவரைத்தொடர்ந்து களமிறங்கிய லியா பால் 19 ரன்களுக்கு, குல்டர் ரைலீ 10 ரன்களிலும் என ஆட்டமிழந்தனர். இறுதியில் அர்லின் கெல்லி 24 ரன்களைச் சேர்த்ததன் மூலம் அயர்லாந்து அணி 50 ஓவர்கள் முடிவில் 8 விக்கெட்டுகளை இழந்து 235 ரன்களைச் சேர்த்தது. வங்கதேச அணி தரப்பில் ரபேயா கான் 3 விக்கெட்டுகளையும், ஃபஹிமா கதும் 2 விக்கெட்டுகளையும் கைப்பற்றினர். 

அதன்பின் இலக்கை நோக்கி விளையாடிய வங்கதேச அணியின் டாப் ஆர்டர் வீரர்கள் ஃபர்ஹான ஹக் ரன்கள் ஏதுமின்றியும், இஷ்மா தஞ்சிம் 2 ரன்களுக்கும், ஷர்மின் அக்தர் 24 ரன்களுக்கும், ஷோபனா மோஸ்ட்ரி 7 ரன்களுக்கும் ஆட்டமிழந்து நடையைக் கட்டினர். அதேசமயம் இப்போட்டியில் நான்காம் இடத்தில் களமிறங்கிய கேப்டன் நிகர் சுல்தானா அரைசதம் கடந்து அசத்திய கையோடு 7 பவுண்டரிகளுடன் 51 ரன்களைச் சேர்த்து ஆட்டமிழந்தார். பின்னர் இணைந்த ரிது மோனி - ஃபஹிமா கதும் இணையும் பொறுப்புடன் விளையாடி அணியின் ஸ்கோரை உயர்த்தினர். 

இதில் ஃபஹிமா கதும் 28 ரன்களில் ஆட்டமிழக்க, அடுத்து களமிறங்கிய ஜன்னத்துல் ஃபெர்டஸ் 19 ரன்களிலும், ரபேயா கான் 5 ரன்களுக்கும் ஆட்டமிழந்து பெவிலியன் திரும்பினர். இப்போட்டியில் இறுதிவரை ஆட்டமிழக்காமல் இருந்த ரிது மோனி அரைசதம் கடந்ததுடன் 67 ரன்களையும், நஹிதா அக்தர் 18 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் வங்கதேச மகளிர் அணி 48.4 ஓவர்களில் இலக்கை எட்டியதுடன் 2 விக்கெட் வித்தியாசத்தில் அயர்லாந்து மகளிர் அணியை வீழ்த்தி த்ரில் வெற்றியைப் பதிவுசெய்து அசத்தியுள்ளது. 

அதேசமயம் இன்று நடைபெற்ற மற்றொரு போட்டியில் ஸ்காட்லாந்து மற்றும் தாய்லாந்து மகளிர் அணிகள் பலப்பரீட்சை நடத்தின. இப்போட்டியில் டாஸ் வென்று முதலில் பேட்டிங் செய்த ஸ்காட்லாந்து மகளிர் அணியில் கேத்ரின் பிரைஸ் 60, மேகன் மெக்கல் 57 ரன்களையும் அடித்த நிலையிலும் 206 ரன்களில் ஆல் அவுட்டானது. அதன்பின் இலக்கை நோக்கி விளையாடிய தாய்லாந்து அணியில் நத்தகன் சந்தம் 63 ரன்களைச் சேர்த்ததை தவிர்த்து மற்ற வீராங்கனைகள் சோபிக்க தவற, அந்த அணி 148 ரன்களில் ஆல் அவுட்டானது. இதன்மூலம் ஸ்காட்லாந்து அணி 58 ரன்கள் வித்தியாசத்தில் தாய்லாந்தை வீழ்த்தி வெற்றிபெற்றது.